Vawin khan Regional Resource Training Centre (RRTC) for Senior Citizens chuan Bawngkawn South YMA Hall ah kum upa te tan “District Level Workshop on Elderly Issues” tih thupui hmangin inkhawm an buaitsaih a. Health Minister Pi Rinpuii chu khuallian niin, Aizawl veng hrang hrang atangin MUP member mi 650 in he programme hi an chhim a ni.
Pi Rinpuii chuan ” Kum upate hi kan rohlute in ni a, in thiamna leh in tawn hriat hlu tak takte hi thangtharte hian ngaihhlut nachang kan hre tan tawh viau a, kan la hriat belh telh telh dawn. Mizoram sorkar pawhin kum upa zawkte hi a theihna chinah a ngaihsak a, pension pawh kan tipung a. An tana tih theih chinah chuan tanpui zel pawh kan inhuam a ni” a ti a. Pi Rinpuii chuan “(8 April, 2025) khan khan Ministry of Social Justice & Empowerment, Government of India buatsaih ‘Chintan Shivir’ – 2 Day National Review Conference Dehradun, Uttarakhand-ah kan nei a. Hetah hian Rualbanlote tan bik school kan mamawh thu ka thlen a. Kum upate tana Day care cum recreation centre kan mamawh thu te, District tina Integrated rehabilitation centre for addicts (IRCA) neih theih ka duh thute ka thlen bawk. Remchang takin Union Minister Dr. Virendra Kumar nen inhmelhriat a, inkawmna hun kan nei thei bawk a, ka sawmna ngai pawimawhin hun remchang hmasa berah Mizoram tlawha rawn zin a tum thu a sawi bawk.” a ti a. District zawng zawngah Old age home Siam thuai a nih tur thu a sawi bawk.
K Lalbiakzuala, Fitness Trainer in upa te tana insawizawi pawimawhnate sawiin, ‘Cardio Exercise’ zirtirna a pe bawk. Pi Lalremruati, Asst. Professor, Aizawl Law College in upa te chanvo leh dikna venhimna dan, Maintenance and Welfare of Parents and Senior Citizens Act, 2007 (MWPSC Act, 2007) chungchang zirtirna a pe bawk. Chawhnu lamah “Cyber Crime & Fraud” tih thupui hmangin, Pu John Vanlalruata Sailo, Sub Inspector, Cyber Crime in social media leh technology hmanga inbumna awm thei te laka inven dan kalkhawmte zirtirna a pe bawk. RRTC for senior citizens hi Ministry of Social Justice & Empowerment hnuaia awm a ni a, Mission Foundation Movement hi Project Implementing Agency niin Mizoram, Arunachal Pradesh, Meghalaya leh Assam te an enkawl mek a ni.
