Vawiin khan Sipai Lammualah nithum chhung awh tur, Aizawl Day 2025 lawmna hun pui tham taka hman tan a ni a. He hunah hian Aizawl Mayor Pu Lalrinenga Sailo chu khuallian a ni. Aizawl Day lawmna hun nikhatnaah hian Faina Kawnga thawk thate, Hotel & Restaurant fai, AMC Short Documentary, College Quiz Competition leh Aizawl Mayor’s Cup a tithate hnenah lawmman sem a ni.
Inaugural Function of Aizawl Day Program hi Pu Joseph H.Lalramsanga, Municipal Commissioner in a kai hruai a. Program bul tan nan Deputy Mayor Pu R.Thanglura’n Exhibition–cum-Stall a hawng a. Hemi hnu hian Khuallianin thuchah sawiin lawmman semna in a zui nghal a ni.
Aizawl Day hawnna puala thuchah sawitu Aizawl Mayor Pu Lalrinenga Sailo chuan Aizawla cheng khua leh tui te duhsakna chibai a buk hmasa a. Aizawl Day hman a lo nih chhoh dan chanchin te, Aizawl khawpui tihhmasawnna atana AMC hmalakna, hlawhtlinna tam tak te leh hmachhawp te a sawi a ni.
