Zoram People’s Movement Party (ZPM) leh Hmar People’s Convention (HPC) tang dunte chuan vawiin khan Sakawrdai, Saiphai leh Suangpuilawnahte Campaign beihpui an thlak a, he hunah hian Chief Minister Pu Lalduhoma, Home Minister Pu K.Sadanga leh Supply Minister Pu B.Lalchhanzova ten hun an hmanpui. Chief Minister Pu Lalduhoma chuan, he council tan hian sawrkar hmasa huna laiin cheng nuai 150 an pe thin a, a bei tham hle tih an hriatin Sorkar thar chuan cheng nuai 150 bakah nuai 190 an pek belh a, chumai bakah Lok Sabha MP Pu Richard Vanlalhmangaiha MP Fund atangin cheng nuai 75 pek an ni bawk a ni a ti a, Sorkar thar chuan, Tuivai lei siamthat hna a ngaipawimawh em em a, hmanraw thar hmangin tunah siam a ni ta a, he lei hi ei leh bar chawkluhna kawng pawimawh tak leh Manipur a awmte nen inkalpawhna kawng pawimawh tak a ni, a ti. Suangpuilawn ah Home minister Pu K. Sapdanga pawhin campaign thusawiin ngampa taka khawtlang leh council mamawhte thlen theitu turin sorkar-na fawng chelh mek party te thlan thlantlin hi a finthlak hle a ti a, thawh hona a ṭhat loh chuan hmasawnna hnuhchhuah turte pawh a muang ṭhin a, mipuiin an tuar a, hruaitute tan pawh a hrehawm ṭhin a, chuvangin hun inher mila vote pawh thlak thiam a pawimawh a ti.
Saiphai khua-ah ZPM campaign hawnna BNRGSK Hall-ah neih a ni a, he huna thu sawitu Supply Minister Pu B.Lalchhanzova chuan, Ram rorelna a kal dik chuan ngaihsak loh bik, thlauhthlak bik an awm tur a ni lo a, Sinlung Hills Development Council inthlan lo awm tur ah pawh hian Development Council mipui hmangaihtu thlan chhuah ngei an beisei a ti a, Ram zahawm leh hnam zahawm ni turin ration card siamthat hna kal pui mek a ni a, mahni veng leh khua theuhah tute chhungkua nge tanpui mamawh zual bik ti a thlei bik neilo a Ration Card endik hna hi kalpui ngam angai a ti. Miharsa zawk ration card vâra awm mêk ration man thara khulte lo mangang lo se, sawrkâr chuan theihtawpin a en fel chho zel a, ZPM sawrkâr chuan a tih dik hna a thawk zêl dawn a ni a ti. Sinlung Hills Council General Election lo awm tura thawk dun ZPM Party leh HPC te hian SHC-a bial 12 awmah candidate tur an ruat fel vek tawh bawk a ni. MNF Party pawhin Sinlung Hills Council General Election pualin khaw hrang hrangah campaign an hawng a. Sakawrdai-a Campaign hawnnaah Opposition Leader Pu Lalchhandama Ralte chuan thu sawiin, ZPM hian State ah sorkar mah se, chhung tin thleng phak thiltih engmah an nei lo a ti a. Thil eng eng emaw zuarin, eng ang policy pawh duangin mipui lakah intiamna hrang hrang nei ṭhin mah se, pawisa an nei lo a, mipui bum nan an sawi mai mai a ni, a ti. Party dangin thlêmna chi tinreng hmangin an la rawn thlêm dâwn a, sorkar thla 10 an hrawn chhûngin an ti ang an tih engmah an ti lo a ti.
Pu Lalchhandama chuan, MNF sorkar chu engmah ti lovah an puh leh dawn a, amaherawhchu an sawrkar laiin New Vervek aṭanga Tuivai inkar motor kal thei tawh lo black top-in an siam ṭha leh vek a ni a ti. COVID avanga hna an thawh theih loh te, chhunzawma hmala anga insawiin ZPM chuan par a chhuang dâwn a, amaherawhchu a bul an ṭan a, an bawkzui a nih chuan a lawmawm a ni a ti.MNF sorkar chuan hmar thimpui tih ṭhin ah eng a hmuhtir ṭan a, an eng telh telh a, zirna lamah emaw, kawng chi kimin hmalam an pan tawh a, tunah erawh hmasawnna an hmuh tawh sa, a ṭhuanṭhu leh mêk zawk a ti a niSinlung Hills Council General Election lo awm turah hian MNF leh HPC (R) an thawk dun dawn a ni.
