Sawrkar laipuia Ministry of Tourism in World Tourism Day puala a buatsaih ‘Best Tourism Village Competition 2024’ ah Sialsuk khua chuan intihsiakna 5 zinga pakhat “Community Based Tourism” ah Best Tourism Village lawmman a la. Vawiina World Tourism Day lawmna New Delhi a neihah Vice President Jagdeep Dhankhar leh Union Tourism Minister Gajendra Singh Shekhawat te chuan lawmman hi an hlan a, Bialtu MLA Pi Baryl Vanneihsangi Tlau leh Mizoram Tourism Secretary Dr. Lalrozama ten Sialsuk khaw aiawhin an dawng a ni. He intihsiakna ah hian State 30 atangin khaw 991 an inlan a, chung khaw 991 te chu category hrang hrang pariat (8) ah thliar leh niin chuta tang chuan khaw 36 te chu lawmman la tura thlan chhuah leh an ni.
Sialsuk khua ah hian mi cheng 2370 awmin, chhungkaw 27 in tourism kaihhnawihin ei an zawng a ni. Tourism atanga sum lut za a sawm hi an khaw Health Care tih changtlun nan an hmang thin a ni. Sialsuk ah hian homestay 10 awmin khum 30 a awm a, kum khat chhungin mi 15000 atanga 20000 vel in Sialsuk hi an tlawh thin anga chhut a ni. Siaksuk Village Council kaihhruaina in Sialsuk Tlang Committee (Sialsuk Ecotourism Development Committee) din a ni a, anni hian tourism tih hmasawnna tur kawng hrang hrang an dap thin a ni.
Best Tourism Village Competition hi kum 2023 atang khan Ministry of Tourism hian World Tourism Day pualin a buatsaih tan a, a hmasa ber atan Reiek khua in Best Tourism Village an lo la tawh bawk a ni.
