Vawiin khan MADC Forest Hall, Council Vaih, Siahaah Livestock insurance khuhhawnna hun hman a ni a, Siaha district chhung khaw hrang hranga ran vulhtu mimal leh society hruaitu kal khawmte Livestock insurance chungchang hrilhhriatna neih nghal a ni.
Hun hman hi Dr. H. Lalzarliana, District AH & Vety. Officer, Siaha district-in a kaihruai a, Mizoramin bung thar a kaina tur hun pawimawh tak hmang tura kal khawmte chu lawmthu hrilhin, rante hi mi kut tawrh vangte, khuarel chhiatna leh hri avangin an thi fo a, chutianga chhiatna tawh palh hlauh anih pawha kut benga kan awm loh nan leh eng emaw zat zangnadawmna kan hmuh theih nan sawrkarin ruahmanna ṭha tak a siam chu ran vulhtu a tam thei ang berin chhawr se a duh thu sawiin, nikuma vawk hri (ASF) lêng vang khan Siaha district chhungah vawk nuai 800 man chuang thi leh suat anih thu Dr. H. Lalzarliana hian a sawi bawk.
Pu HZ Lalremtluanga, National Insurance Company Limited aiawh chuan Livestock Insurance inkaihhruaina leh kalpui dan tur a sawi zau a, Insurance kan tih reng rengin zaa za (100%) hmuh let theih a ni lo va, hri lenna hmuna sawrkarin a puan meka chengte tan insurance a tih theih loh bawk; chutih rualin Mizo mipuite hmakhua ngaia Mizoram sawrkar leh National Insurance Company Limited-in thawhhona thuthlung a ziak hi thil lawmawm tak a ni, a tam thei ang berin chhawr se a duh thu a sawi bawk.
