Vawiin khan Serchhip DC Meeting Hall-ah District chhunga Sansad Adarsh Gram Yojana (SAGY) Scheme hnuaia Model Village pali-a hmalakna thirho a ni.Serchhip District-ah hian SAGY hnuaiah model village atana Member of Parliament (MP) ten an thlan khaw pali a awm a. Kum 2014-a Pu CL Ruala thlan Khawlailung leh Pu Ronald Sapa Tlau thlan Chhiahtlang te, kum 2021-a Pu C. Lalrosanga thlan Khumtung leh 2023-a Pu K. Vanlalvena thlan North Mualcheng te an ni.
Meeting hi Pu V. Lalengmawia, Addl Secy., Rural Development Department chuan a telpui a, Pu Paul L Khuma, DC Serchhip chuan meeting hi a kaihruai a ni. Model Village kaihhnawih line department te meeting-ah hian an tel a, SAGY hnuaia hna thawhte chu a tha thawkhata ngaih a ni a, hmachhawp la awmte chu theih ang anga bawhzui tura rel a ni.
Thingtlang khuaten sawt zawka hmasawnna rahbi an rah theihna turin SAGY hi sawkar laipui chuan a duang a. Lok Sabha leh Rajya Sabha MP ten thingtlang khua an duh ber model village atan an thlang a, heng an thlanchhuah khuaah te hian sawrkar laipui scheme hrang hrang te kalpuiin a theih chin chinah state scheme te nen chhunfin a ni a. DC kaihhruaina hnuaiah monitoring committee din niin hmalakna hrang hrang te an vil a ni.
