Vawiin khan District Agriculture Marketing Committee (DAMC), Serchhip District buatsaihin Mizoram Agriculture Marketing Board member ten Serchhip District ah Handholding Policy, 2024 hnuaia thlai thar lei leh hralh chungchang inhrilhhriatna hun Sensitization Programme an hmang a. He hun hi DAMC Chairman Pu Paul L.Khuma chuan kaihruaiin Serchhip DC Pisapui Hall ah vawiin nileng khan hun an hmang a ni. Serchhip DC Pu Paul L. Khuma chuan Mizoram economy chawikanna tura thil pawimawh, kuthnathawktute dinhmun chawikanna tura sawrkar policy dinglai Handholding Policy kalpui tan a ni chu lawmawm a tih thu leh thlai thar lei leh hralh chungchang inzirtirna nei tura MAMB member te an lo kal avangin lawmthu a sawi a. Mizorama kuthnathawktute leh loneitute dinhmun harsa taka an din mek na hmun atanga bana kai chhuak turin he policy hi a tangkai hle dawn a ni, a ti. Serchhip DAMC in hmalakna an lo kalpui tawh dan thenkhat te powerpoint hmangin DC hian a tarlang a. DAMC chuan Serchhip District chhunga office te zirchiangin thlai thar dahkhawmna tur kudam leh cold storage an neih dan an thlithlai, tih a sawi a. District Agriculture Office, District Horticulture Office, Supply Office leh Rural Development Department ten hmunhma an neih mek te chu thlai thar dahkhawmna tur hian a tangkai dawn, tih DC chuan a sawi a ni.
Dr H.Saithantluanga, OSD to Minister, Agriculture and Farmers Welfare Department chuan thlaithar lei leh hralh dan tur Scheme sawifiahna hun a hmang a. He scheme hnuaiah hian thlai thar thlan bik -sawhthing, aieng, hmarcha leh hmunphiah a awm thu leh, heng thlai thlan bikah te hian Minimum Support Price pek an nih dan tur kalphung a sawifiah a ni. Pu Isaac Lalremruata, Co-opted Member, MAMB chuan kuthnathawktuten an thlai thar chhuahte man man zawka an hralh theih na turin Handholding Policy hi din a ni, a ti a, thlai thar lei leh hralh dan tur chipchiar a sawifiah a ni. Handholding policy hnuaia thlai thlan bik chingtute chu society ah an inziaklut ang a. Heng society-a inziaklut farmer te chuan thlai hrang hranga sawrkarin a bithliah Minimum Support Price an dawng thei dawn a ni. Sawhthing hi kg ah cheng 50 aia tlem loa farmer ten an hralh theihna turin ruamanna siam a ni a.
Society member te hian an thlai thar chhuah te hi Primary Collection Centre (thlai tharchhuah dahkhawmna) ah an dahkhawm ang a. Primary Collection Centre hi society ten an duh dan leh remchanna hmunah an siam dawn a ni. Primary Collection Centre atang hian Secondary Collection Centre ah phurhkhawm leh a ni dawn a. Secondary Collection Centre hi District tinah hmun thum emaw hmun li theuh chauh siam a ni dawn a, he Centre atang hian company ten thlaithar hi an leichhuak ang. Thlaithar te hi lilam tur a ni a. Company ten an chhanna hi sawrkarin a bituk zat (eg. sawhthing kg ah 50) aia a tlem chuan a tlin lohna zat (balance) hi sawrkarin farmer te a pe thung dawn a ni. Farmer te hian sawrkarin a bituk sak aia sanga hralhna an hmu a nih chuan zalen takin an duhna apiangah an thlai thar te hi an hralh thei ang a. Minimum Support Price an dawn duh erawh chuan heng society-ah hian an inziah luh a ngai thung a ni.
