Vawiin khan Serchhip Bawrhsap Pu Paul L.Khuma, Competent Authority for Land Acquisition (CALA) ni bawk chuan Chhiahtlang, Chhingchhip, Khumtung leh Baktawng Chan In te tlawhin, NH54 kawngpui siam mek dinhmun a en a ni. DC Pu Paul L.Khuma leh a team te hi National highway kawngpui zauh hna enkawltu National Highway Infrastructure Development Limited (NHIDCL) hotute leh Contractor te bakah khawtlang hruaituten an lo dawngsawng a. Mimal leh pawlin harsatna an neih te bakah tun hnai ruahsur nasa avanga hnathawh khaihlak te a hmunah an en a. Contractor te hian an hna thawh tawh chin dinhmun leh harsatna an neih te, an thawh chhunzawm zel dan tur ruahmanna te DC hi an hrilh a ni.
NH-54 kawng siam meka Serchhip District chhung Chhiahtlang, Chhingchhip, Khumtung leh Baktawng Chan In a kawng la siam zawh lohte leh tun hnaia ruah sur nasa avanga harsatna awmte DC chuan a tlawhchhuak a. Kawng siam hi zawhfel thuai a nih theih nan chak taka hmalak a nih mek laia kawng siamna tikhaihlak thei thil awm te a hmunah a en a. Harsatna neite pawhin an harsatna te DC hnenah hian an lo thlen nghal bawk a ni.
National Highway siamthat leh zauh hna thawh kal mekah harsatna awm te leh a chinfel dan tur ruahmanna sawihoin meeting vawi engemaw zat neih a lo ni tawh a. District Administration tirhin kawngpui siam mek te endikin vawi engemaw zat vah chhuah a ni tawh thin bawk a. Vawiin hian Serchhip DC Pu Paul L.Khuma hoa fehchhuak team te hian thutkhawm an neih tuma hmachhawp an neihte hlenchhhuah a ni em tih a hmunah an en a, contractor ten hna an thawh zawh hun tur siam felpui nghal an ni bawk.
