Social Welfare Minister Pi Lalrinpuii’n ruang phurh chu tun thla september ni 1 atangin Mizoram pumpuiah sawrkarin mawh ah a la tawh dawn a ti. He thu hi vawiina thuthar thehdarhtute a pisaa a kawmna ah sawiin Minister chuan ruang phurh nan budget ah cheng nuai 500 dah a ni a ti a, ruang phurhna atan sawrkar hnuaia motor inziak lut zinga empanel te chu hman theih an ni dawn tih sawiin ruang phurh man chu sawrkarah dil let theih ani dawn tih a sawi.
Minister chuan ruang phurh tanna leh a dahna inkar chu km 20 tal ani tur ani a ti a, ruang phurhna atan lirthei pakhat chauh hman tur ani tih sawiin Department in a kenkawh dan an siam sa vek a ti a, ruang phurhna man hi department ah emaw district chhunga District Social Welfare hnenah thehluh theih ani dawn tih sawiin an motor hman man chu sawrkar in rate a siam angin a rul let dawn tih a sawi.Minister chuan damdawiina thi anih loh chuan dilna form-a inziak angin thuneitu hriatpuina thil tel tur ani dawn a ti a, a dan chuan motor hman man ngawr ngawr chauh a huam dawn tih a sawi.
Pi Lalrinpuii sawi danin ruang phurh man sawrkar in mawh a a lakna chhan chu MLA te phurrit lutuk chhawk tur leh mi tam zawk huapzo turin a ni a ti a, voter ID emaw Aadhaar card nei te tan dil theih ani tih sawiin a hranpa in raltlan an huap tel lo tih a sawi bawk.
