Nimin khan Calcutta Mizo Welfare Association (CMWA) chuan kum 2026 Chapchar Kut lawmna hun chu Mizoram House, Salt Lake-ah an hmang a. Dr. Vanlalthlana, Minister, School Education Department, etc. chuan Kut Pa niin hun a hmanpui.
Kut Pa Dr. Vanlalthlana chuan Kolkata khawpuia Chapchar Kut lawma kal khawm Mizote chu fakin, Mizoram tan Kolkata chu kawtchhuah ber a ni a, Kolkata-a Mizo fa cheng leh khawsate chu Zo nun ze mawi lan chhuahtir kawnga hun rei tawh tak aṭanga tha lo thawh tawh ṭhin an ni, a ti a. Dam lo leh mitthi ruang buaipui bakah harsatna tawk hrang hrangte tlawmngaih chhuaha an ṭanpui ṭhin thu a sawi a. Kumin Chapchar Kut thupui angin CMWA chuan inrem leh inlungrual takin Mizo hnam tan hna an lo thawk tawh ṭhin tiin, Mizo hnam tana malsawmna an lo nih tawh ṭhinna chu vawng nung zel turin a chah.
Minister chuan Chapchar Kut ṭobul chu hlawhchhamte hnem duhna thinlung a ni tiin, Zo nun ze mawi lantira dinhmun chhe zawkte tana ke pen zel turin kal khawmte a fuih a. Ram pawna kan awm hian chhuang takin kan Mizona kan tilang ngam ṭhin tur a ni tiin, Mizo thil danglam bikna chu hnam dang hmuha thiam taka pho chhuak ṭhin turin Chapchar Kut hmangtute a chah.
CMWA buatsaih Chapchar Kut hi CMWA President Pu C. Lalmuanzuala’n kaihruaiin, Kolkata Mizoram House Joint Resident Commissioner Pu Zoremthara Ralte chu Kut Thlengtu a ni a. Intihhlimna hun hrang hrang hman niin CMWA General Secretary Dr. Lalrinpuia’n lawmthu sawiin kut ruai kil ho a ni.
Minister Dr. Vanlalthlana hi Pu C. Lalthanzira, Samagra Shiksha State Project Director leh PS to Minister Dr. Albert Vanlalruata te’n an ṭawiawm a ni.
