Sazuk kap leh a sa hmanga sumdawng nia puh, Rabung leh Pamchung khua mi 4 te chu vawiin khan Chief Judicial Magistrate, Champhai District Court ah hruai an nih hnuah Champhai District Jail ah dah luh an ni. Sazuk sa kaptu a puhte hi Lalngilneia, Zohmingthanga leh Hmangaihzama, Rabung khua te leh Lalpianmawia – Pamchung te an ni.
Kumin February ni 13 khan Aiduzawl peng, Ngopa panna kawngah Khawzawl Wildlife Division hnuaia Wildlife Guard duty te chuan Sazuk sa hi Pikup, MZ-06/6411, Aizawla kal tur Pu S.Zirmawia Dawrpui Vengthar khalh lai chu lo endikin Sa fun 21, Kg-26 leh a chanve zeta rit chu an lo man ta a ni tih Pu Lalduhthlana, Khawzawl Wildlife Division DFO leh Champhai DFO ni bawk hnen atangin thu dawn a ni.
Sazuk hi danin a humhalh a, WildLife (Protection) Amendment, 2022 hnuaiah Schedule-I ah dah a ni a, a tihlum emaw, a sa zuar emaw chu Kum 3 (thum) tal lungin tan leh kum 7 sarih thleng Lungin tan theih a nih bakah Rs.25,000/- aia tlem lo chawi tura hrem theih a ni.
