Horticulture Department changtu Minister Prof Lalnilawma’n sawrkarin sawhthing chu direct in a lei dawnlo a ti a, a leitu turte leh a chingtute indawrna tur a ngaihtuah sak zawk dawn tih a sawi.He thu hi vawiin Assembly thutkhawma zawhna leh chhanna hunah sawiin Minister chuan sawhthing chingtuten an hralh theih nan sawrkarin theihtawp a chhuah a ti a, sawrkar chu a leitu ah tang lo in an indawrna tur lo ngaihtuah sak tu tur ani dawn a ti a, a chingtuten tha taka an hralh theih nan theihtawp an chhuah tih a sawi. Minister chuan Mizoram chhungah sawhthing mi 20,102 in an ching mek tih sawiin tun dinhmunah sawhthing tam 6586 report an dawng a ti a, department in sawhthing tam buaipui turin chak takin hma a la mek a ti a, society khaw tinah din ani tawh tih sawiin chak zawka hmasawnna a awm theih nan an bawhzui mek tih a sawi.
Prof Lalnilawma chuan State pawn atanga thlai leh thei lakluh leh endik chu Horticulture Department hmalakna hnuaiah a awm loh avangin a him leh him loh endik chungchangah Horticulture Department chuan hriat a nei lo a ti a, Thlai leh thei lak luh him leh him loh endikna Pesticide Residue Analysis Laboratory siam tura hmalakna duanchhuah chu thil tha tak a ni a ti bawk. Mizoram chuan Mizoram thlai thar 4 – sawhthing, hmunphiah, hmarcha leh aieng te chu Research nena kalpui mek ani tih sawiin thlai leina turin sawrkarin rate a siam tawh a ti a, sawhthing chu cheng 50 aia tlem loa lei tura ruahman ani tih sawiin hmunphiah chu cheng 100 leh cheng 80 in lei ani dawn tih a sawi bawk.
Minister chuan RKVY hnuaiah Mizoram Vety College in project kum 3 chhung an buaipui hnuah thlai thar state dang atanga lakluh test vek theih tura ruahman ani a ti a, hemi buaipui nan cheng vbch 11.8 an sanction a ti a, first installment ah 2.65 crore hmuh tawh ani tih sawiin hei hian nasa takin hmun dang atanga thil tha zawk lakluh kawngah a pui dawn niin a sawi bawk.
