Mizoram sorkar chuan tunhnaia ruah, rial leh thliin chenna in a tihchhiat sakte chhawmdawlna’n State Disaster Relief Fund (SDRF) atangin cheng nuai 450 a pe chhuak tawh. March 31 leh April 2 inkar chhung khan ruahsur, thli tleh leh rial tla avangin Mizoram hmun hrang hrangah chenna in 2,646 a chhia. Chenna in chhia 2,646 zinga 335 chu luahzui tlak lohin a chhe vek a, 2,311 chu a chhe vek lo thung. Thli, ruah leh rial tla avang hian mi pakhatin nunna a chan a, mi 5 an hliam a an zinga pakhat chu State Referral Hospital-ah enkawl mek a ni. Chenna in chhiate chhawmdawl thuai an nih theihna atan SDRF nodal department Disaster Management & Rehabilitation (DMR) department chuan hma an la nghal a, DMR minister K Sapdanga hovin April 1 khan official-te an thukhawm a.
Chhiatna tuarte chhawmdawlna atan SDRF fund atangin hmanhmawh takin rangva leh silpauline lei nghal tur a tih a nih angin thupek siam nghal a ni. Rangva hi eng emaw zat lo thleng tawh. Hei bakah hian DC-te’n SDRF fund an kawl sa theuh atangin hmanhmawh takin a theih ang angin chhiatna tawkte hnenah tanpuina an lo pechhuak mek zel bawk a ni. DMR department chuan SDRF fund pawh hi a bik takin a dil belh nghal a, Finance department chuan April 4 khan a pe chhuak. District bawrhsapte hnenah a rang lama pe chhuak turin hmalak nghal niin, nimin khan bawrhsap zawng zawng hnenah pek fel a ni a.
Bawrhsapte hnena sum pek chhuah hi chhawmdawlna (respond & relief) atan cheng nuai 225 leh (thil tihchhiah lakchhuah leh sak that lehna (recovery & re-construction) atan cheng nuai 225 a belkhawmin cheng nuai 450 a ni. District bawrhsap 11 te hnena sum pek chhuah zingah Aizawl district pek tam ber a ni a, cheng nuai 100 pek a ni a, Lunglei district-in dawtin cheng nuai 50 pek a ni a. Kolasib, Champhai, Serchhip, leh Saitual district-te chu cheng nuai 40 theuh pek an ni a. Lawngtlai, Mamit, Khawzawl leh Hnahthial district te cheng nuai 30 theuh pe-in Siaha district chu nuai 20 pek a ni.
