Sorkar in mipui phur lirthei hman man a bituk ang zawm loh avangin tun hnai thla ruk chhungin thuneituten mipui hnen atanga complain pakhat chiah an dawng. Mizoram Transport Department, Aizawl DTO-a Enforcement thuneitute chhinchhiah danin, kumin chhungin lirthei hman man chungchanga lungawi lohna thlen theihna an hawnah complain an dawng lo a, an dawn hnuhnu ber chu nikum December thla khan niin, hei hi tun hnai thla 6 chhunga complain an dawn awm chhun a ni a, Bus Fare kir duh lo avanga complain an dawn hi bawhzuiin thil tisualtu chu cheng 500 an chawitir tih an sawi.
Enforcement thuneitute chuan, lirthei chuan man chungchangah mipuite chu phun lungawi mai lo a, an hnena report thin turin an chah nawn a, chuan man aia sang la leh hemi chungchanga harsatna neite tan phone number- 9862753656, 9862979014 leh 8974158183 ah te engtik lai pawha thlen theih a nih bakah ziak leh an office, Chaltlang ah pawh thehluh theih a ni tih an sawi.
Puan tawh angin, State Transport Authority chuan man chawia mipui phur lirthei chuan man thar ber chu kumin February ni 19 khan a ennawn hnuah rate an siam ang chu 2-Wheeler taxi chuan man Km 1 ah cheng 30, km 1 hnu ah cheng 20 zel, taxi pangai chuan man cheng 55, km 1 hnuah cheng 45 zel, autorickshaw chuan man km 1 ah cheng 35, km 1 hnuah 25 zel. Maxicab metal road ah tlanin km 1 ah cheng 3.5, km 1 hnuah cheng 4 zel. City Bus chuan man chu cheng 8 a atanga intanin, cheng 35 thleng.
