Agriculture & Farmers’ Welfare changtu Union Minister of State, Bhagirath Choudhary an Mizoramin chak takin hma a sawn mek a ti a, kum 2029-ah loneitute sum lakluh tun aia a let li a a pun theih nan sorkarin hma a la mek a ti bawk. He thu hi vawiina BJP pisa, Aizawla chanchinbumite a kawmnaah Minister chuan a sawi a. Minister chuan PM-Kisan Samman Nidhi hnuaiah sorkar laipui chuan loneitute sum mamawh a ngaihtuah reng thu a sawi a, lo leh leileta tui mamawh ang tawk an hmu thei lo chu tunhnaia loneitute harsatna lian ber a ni a, loneitute tan tui dahkhawlna tha siamsak chu hmalakna tur pawimawh hmasa a ni a ti.
Minister chuan state sorkarin an dil phawt chuan sorkar laipui chu loneitute mamawh hrang hrang, thlai chi, lei chi leh adangte a rawn pek reng theih thu a sawi a. Mizoram hmasawnnan sorkar laipui chu state sorkar nen kawng hrang hrangin hna an thawk chho dawn a ni a ti a. Mizoram chhunga thlai thar te chu ramdanga thawnchhuah dan tur pawh an ngaihtuah zel tur thu a sawi a ni. Minister chuan inkalpawhna pawimawh rel kawng leh airport chu a ngaih pawimawh thu a sawi a. Mizoram chuan khualzin te hmanga sum lalut turin theihna sang tak a nei tih sawiin Mizoram hmasawnna tur sum chu tourism hmang ringawt pawhin tam tak Mizoramin a hmuh theih a beisei thu a sawi a ni.
Minister chuan Prime Minister Narendra Modi-a’n Mizoram hmasawnna tur a ngaihpawimawh thu a sawi a. Mizoram mai ni lo, India ram pumpui chu ram changkang leh hmasawnah kum 2047-ah chuan siam a tum thu a sawi a ni.
