Department of Personnel & Administrative Reforms department changtu Minister Pu K. Sapdanga’n sawrkar hnathawk tura lak chuan eng vang pawhin a hna a thawklo anih chuan aikal la mahse dan a bawh pelh tho tih a sawi. He thu hi nimina Assembly thutkhawma a demand sawihona ah sawiin Minister chuan sawrkar danin thawktu damlote chunga khawngaih a lantirna tam tak a awm a, Leave hrang hrang awmin danin a phal chin ramri pel chu Kohhran pawhin a thunun mai a, chung chu sawrkar tihdan tur ni awm tak a ni a ti.
Pu K. Sapdanga chuan Mizoram sawrkar hnuaia secretariat emaw, directorate emaw subordinate department 42 awmin aikal la department 38 an awm a, aikal hi 3365 an ni a, aikal la te hi a mal malin chhui chhuah thawkhat tawh niin aikal awm lohna department 4 an awm a, heng te hi Excise, DP&AR, ICT leh Vigilance te an ni tih a sawi. Minister chuan Zirtirtu in amah aia thiam zirtirtu ruaiin zirlaite tana alo tangkai zawk anih pawhin danin a ngaihnathiam ngawt a thiang chuanglo a ti a, Ailak te hi Sawrkarin a zirchiang mek a, eng vang pawhin hriatthiam theih an ni lotih sawiin aikal la zingah hian mithi aikal te pawh an awm niin a sawi bawk.
Minister chuan Department thenkhat aikal nei tam zingah School Education Department 1115, Health & Family Welfare Department 624, Power and Electricity Department 253, General Administration Department 239, Public Works Derparment 119 leh Rural Development 109 te an ni a, Aikal lak chhuanlam hrang hrang zingah hriselna chhuanlam an tam ber a, 2070 an awm a, chhungkaw harsatna avanga chhuanlama hmang 703 an awm tih sawiin mimal harsatna vanga aikal la 350 an awm a, Chhan sawi tur hrelo 90 aawmin Hotu lian te thupek vangin 35 an awm mek a, zirna sang zawk duh vang 43 an awm a, tarlan tlak loh 74 an awm a ti bawk.
