India rama sawrkar damdawi in ṭha bik thlan zingah Khawhai Primary Health Centre an tel. National Health Mission, Health & Family Welfare Department aṭanga thu dawn danin, India rama sawrkar damdawi in ṭha bik tehna, National Quality Assurance Standards (NQAS)-ah Khawhai PHC te chu an tling a, a tehnaah 90.13% an hmu. Heti hian Mizorama Sawrkar damdawi in 14 te chu NQAS national certificate nei an ni tawh a.
Tunah hian sawrkar damdawi in 15-in state level paltlang tawhin national certificate hi an dil mek bawk a ni.Health Minister, Pi Lalrinpuii chuan, India rama damdawi in ṭha bik thlan chhuah zingah Mizorama damdawi in an awm belh zel chu Mizoram tan mellung pawimawh tak a nih thu leh thawktu zawng zawng te thawhrimna leh taimakna chhuanawm a tih thu sawiin, he’ng tehna te hi Sawrkar damdawi in pantu damlote chu a chhawr ṭangkai bertu tur an nih thu a sawi.
