ZPM sorkarin kuthnathawktute thar chhuah man man zawka hralh tura inthlan hma leh an sorkar hnu a thu an tiam avangin kumin hian sawhthing quintal nuai 11 thelh thar beisei a ni. Horticulture department hotute hnen atanga thu dawn danin kumin hian chhungkaw 25,102 chuan ram acre 27,608 point 528 a zau-ah sawhthing quintal nuai 1, sing 6, sang 8, 583 leh kg 298 an ching a. An thar chhuah theih zat tur hi quintal nuai 10, sing 9, sang 3 leh 299 vel ni a chhut a ni. Hetih lai hian sawhthing a tam nasat avangin sawhthing chingtu tam takin harsatna an tawk mek a. Hetianga kumina sawhthing ching chhungkua leh sawhthing chin a lo pun tak chhan hi sorkarin a hralhna a hmuhsak dawna an rin avang leh sawhthing man a tlak hniam pawh a, sum an hloh lohna tur atana sorkarin sum thawhsak a tiam vang niin a lang. Hetih lai hian kumin hian sawhthing a tam nasa hle a, hemi avang hian kuthnathawktute hian an thawh rah ang an seng lovang tih an hlau hle.
August ni 16-a horticulture department hnena report lut atanga a lan danin sawhthing chingtu chhungkaw 25,102 zinga chhungkaw 6,568 te sawhthing chinna ram, khaw 236 chu sawhthing tam hian a khawih mek a ni. Sorkarin sawhthing tam do tura August ni 16 atanga beihpui a thlak tan ‘Operation Ginger 2024 – Fehchhuah Runpui’ -ah chuan Nilaini thleng khan khaw 367 a sawhthing chingtu mi 5,376 te hnenah zirtirna pek a ni tawh a ni. Horticulture minister Prof. Lalnilawma chuan Fehchhuah Runpui hi kalpui mek a nih thu a sawi a, hnathawktu indaih lo chung pawhin August thla chhunga zawhfel tum a nih thu a sawi a ni.
Sorkarin ‘Bana kaih’ ruahmanna hmanga thlai chingtute puih a tuma kal mekah sawhthing bakah thlai dang pawh kumin hian chingtu an pung niin horticulture department hotute chuan an sawi a. Aieng hi chhungkaw 3,415 chuan ram acre 4,282 point 6-ah quintal 7,817 leh kg 155 an ching a, thar chhuah an beisei zat chu quintal 81,609 leh kg 9 a ni. Chutiang bawkin hmarcha te hi chhungkaw 8,687 zetin ram acre 11,831 point 42-ah quintal 585 chu kumin hian an ching a, quintal 37,929 leh kg 457 thar an inbeisei a ni.
