Vairengte Forest Range Staff leh Excise & Narcotics tangkawp ten tun thla March ni 5-a Saphu kawr Kgs 98 vel an man chhuizuina kal zelah mi pahnih an man.
Forest Department chuan Lalzuithangi (kum 41) Champhai leh Vanlalzawni (kum 42) Zemabawk, Aizawl te chu manin, nimin tlai khan District Jail-ah dah luh an ni a; an mi man zinga Lalzuithangi hi Wildlife Crime Control Bureau, Govt. of India te pawhin hun engemaw chen atanga an lo chhui tawh a ni.
Pi Margaret Lalramchhani, Divisional Forest Officer, Kolasib-in a thuchhuah siama a tarlan dan chuan, tun thla March ni 5 zing dar 4:40 vela Vairengte Forest Range Staff leh Excise & Narcotics tangkawp ten Saphu kawr kg 98 vel Saphu kawr motor atanga an rawn phur chhoh chu an man a; lirthei khalhtu Laldaniela S/o Happy Valley,Shillong chauh rawn chuangin, man nghal a ni a.
Hemi thubuai chhui zuina kal zelah hian hetiang lam sumdawnna lamah hian a zawmpui te chhui chhunzawm nghal char char niin, inhnamhnawih ngei ni a hriat mi pahnih, Lalzuithangi Champhai leh Vanlalzawni Zemabawk, Aizawl te chu man an ni a; Aizawl lam atang in mi pakhat, Laltanpuia, Bethlehem Vengthlang, Aizawla khawsa mek chu man a ni bawk.
Tarlan tawh angin Saphu kawr hi Vairengte Excise Check gate-ah Shillong leh Aizawk inkar Maxicab service atanga man a ni a; Maxicab khalhtu hian Counter nghaktuten ‘Vawksa rep’ ti a an sawi thu leh Counter-a dah tura an tih anga phur mai a nih thu alo sawi tawh a ni.
