BJP Mizoram hruaitute chuan Congress hotuten BJP chu Kristiante nuai chimih tumtu tia tawngkam an chhakchhuak fo chu thalo an tih thu an sawi. Nimin khan Aizawl Press Club a chanchimbu mite hmaah he thu hi sawiin BJP Mizoram thupuangtu Pi Lalremsangi Fanai chuan BJP chu Secular paihbo tum tu, UCC kalpui tumtu, Article 370 lakkian chungchang sawi zawm a Mizo mipuite sawithaihna tawngkam an chhakchhuak fo chu Mizoram BJP chuan thalo a ti hle a ni, a ti a.
All India Congress Committee (AICC) chuan tun thla ni 5 khan Lok Sabha Election Campaign Manifesto tlangzarhin, “Kan ti ang” tih intiamna hrang hrang point 300 chuang an ziak a, hengah hian Congress Party in sakhaw zalenna- Secular a dah pawimawh tur emaw, Secular tih sawirikna pakhatmah hmuh tur a awm lo a ni, an ti. He hunah vek hian BJP hruaitute chuan CAA chu hman a nih pawhin North East Tribal te a huam dawn lo an ti a, hei vang hian Meghalaya Lok Sabha MP Agatha Sangma, Mizoram Lok Sabha MP Pu Lalrosanga te pawhin Bill thlawp zawng in Vote an pe ta a ni, an ti a.
FOREIGN CONTRIBUTION REGULATION ACT (FCRA) 2010 pawhsawilangin FCRA chu India rama Kristian te chauh emaw Mizoram NGO te chauh tihtawp anga sawiduh an awm thin thu leh FCRA fimkhur zawka kalpuina hian India ram chhung NGO zawng zawngte a huam a ni, an ti. Mizote zingah Mizoram State Special Provision Art 371G pawh lak bo mai hlauhawm leh him lo tia insawithawih fo pawh insawithaihna awmze nei lo a ni an ti.
