Vawiin khan District Veterinary Hospital Saitualah World Veterinary Day pualin ran hriselna a thlawna endik runpui “Animal Health Camp” neih a ni a, Saitual District Bawrhsap Dr.Lalngura Tlau chu khuallian niin hun hawnna a hmanpui. Bawrhsap chuan thu sawiin World Veterinary Day puala ran hriselna endik runpui buatsaih a ni chu lawmawm a tih thu leh he hun a hlawhtlin theih nana mi inpe zawng zawngte chungah lawmthu a sawi a, a hranin Clinic huaihawtna tur sum awm lo mahse ran vulhtute tana thil țangkai tur a nih avangin kawng dap a ni, a ti. Bawrhsap chuan Vety hotute chu tun chauh lo, kum dangah pawh mipuite tana hetiang hun an buatsaih thei a nih phawt chuan District thuneitu lam chu an in hawng reng a ni, a ti a, District chhung khaw tina ran vulhtu hetiang mamawh ngawih ngawih an hriatreng thu sawiin, kal chhuah vek ngaihna a awm loh avangin he hun chhim pha lote hriatthiamna a ngen a, vawiina clinic pantute chuan a țangkai thei ang bera hun hmang turin duhsakna a hlan bawk a ni.
Vawiin Free Clinic hi mipuiin a hlut hle a, Saitual leh Keifang mipui tan Vety Hospital Building a hun hawn a nih bakah khaw țhenawm, Rulchawm, Ruallung, Sihfa leh Dilkhanah insemdarhin hun hman zui a ni. Free clinic chhimtute zingah ui â hri danna Anti Rabbies Vaccine (ARV) hi ui 406 hnenah pek an ni a, ran dang chi hrang hrang entir leh zai a nih bakah ran vulhna hmuna kal chilh ngaite a awm bawk. Vawiina Animal Health Camp chhimtu ran enkawlna pek hi 611 an tling a ni.
Vawiin hun hmanna hi AH & Vety Deptt, Mizoram State Vetenary Council (MSVC), Indian Veterinary Association (Mizoram) leh NMBA, DC Office Saitual te ţang khawmin an buatsaih a ni a, AH & Vety Doctor 38 leh 4th Year zirlai 26 te chu he Animal Health Camp atan hian an fehchhuak a ni.
