Vawiin khan DC Conference Room, Saitualah District Bawrhsap Dr. Lalngura Tlau kaihhruainain PM Vishwakarma Scheme chungchang relin District Implementation Committee (DIC) te chu an thu khawm a, PM Vishwakarma hnuaia Saitual district chhunga trade hrang hranga dilna luh dante thlirho a ni. He hunah hian District Bawrhsap Dr. Lalngura Tlau chuan kalkhawmte hnenah lawmthu a sawi a, PM Vishwakarma scheme hnuaia khaw hrang hrangah inzirtirna leh inhrilhriatna ‘awareness’ neih tam tawk loh avangin dilna a luh tlem thin thu a sawi a, hemi kawngah pawh ṭan la thar theuh turin kalkhawmte a chah nghal a ni. Bawrhsap chuan PM Vishwakarma chu a thlawna pawisa dawnna a nilo tih zau zawka puanzar a tul tih sawiin, sekibuhchhuak ni loin, tha thawh ngai, mi taima tana dil chi a ni tih mipuiten hria se a duh thu a sawi bawk.
Vawiin thutkhawmah DIC chuan Digital Flyer Commerce & Industries lamin siam sa an neih chu mipuite hriat theih tura a tam thei ang theh darh ni se an ti a, PMU (Project Management Unit), Commerce & Industries Department-te chu PM Vishwakarma chunghangah training tura sawm theih reng an nih thu tarlan a ni bawk.Vawiin thutkhawmnaah hian Pi Ellen Lalnunmawii, State Engagement Officer, NSDC chuan PM Vishwakarma duan a nih dan leh a tum tlangpuite PPT hmangin a sawifiah a. PM Vishwakarma chungchanga hriat fiah loh leh zawhna awm theite sawiho a nih bakah training neih dan turte, nasa leh zuala awareness neih dan turte sawiho a ni. Saitual District ah trade 18 atangin trade 13 ah dilna mi 435 te hnen atanga lutin Stage 1 (VC level) mi 168 in an paltlang a, Stage 2 (DC level) ah mi 168 vekin, Stage 3 (State Level) mi 122 ten paltlangin training tura koh an ni. Diltu zingah kum 40-50 inkar an tam ber a ni.
PM Vishwakarma Scheme inkaihhruaina (guidelines) hi www.pmvishwakarma.gov.in website ah chipchiar zawk a en theih a ni a, Directorate of Commerce & Industries, Khatla leh District Industries Centre zawng zawngah zawh fiah theih reng a ni bawk. Vawiin thukhawmah hian Dr.Lalngura Tlau, DC, Pu V Laldinsanga, DCIO, i/c of DIC, Saitual District, Pu Lalthakima, SDO(S), Pi Christina Lalnunfeli, SDC, Pu Robert Zosangliana, LDM,Serchhip, Pu Lalzarmawia, Principal, Govt Saitual College, Pi Ellen Lalnunmawii, State Engagement Officer, PM Vishwakarma, NSDC, Pu S Liankhankhup,District Co-Ordinator, PM Vishwakarmka, Saitual District te bakah, e-district Manager, Saitual, DUDO aiawh leh NGO hrang hrang aiawhte an tel thei a ni.
