Vawiin chawhma khan DC Conference room, Saitualah Village Council Inthlanpui 2025-a Booth Level Officer (BLO) thawk tha bera thlan Pu RLC Lalthatluanga, BLO 9/10, Saitual V hnenah District Election Officer, District Bawrhsap ni bawk Dr. Lalngura Tlau chuan chawimawina thuziak leh sumfai a hlan.
He hunah hian Dr. Lalngura Tlau chuan thu sawiin inthlan muanawm leh felfai a awm theih nana hna tha taka thawktu BLO te chu fakawm a tih thu a sawi a, BLO te zinga hna thawk tha bera thlan Pu RLC Lalthatluanga chu a lawmpui thu a sawi bawk. DEO chuan a thiamna te ram tana hmang chhunzawm zel a, midangte tana entawntlak ni zel turin Pu RLC Lalthatluanga chu a chah nghal a ni.
BLO chawimawina hunah hian Dr. Lalngura Tlau, DEO bakah Pu Lalthakima, EO, Pi Christina Lalnunfeli, SDC, SVEEP Nodal Officer, Pi F. Zodingpuii, DIPRO, SVEEP Asst. Nodal Officer leh sawrkar department hotute an tel a ni.
