Vawiin khan Rural Development Department chuan Department hnuaia scheme hrang hrangte District leh Block level-a Officer te’n an kalpui dan thlirletna hun chu Aijal Club-ah an hmang a. Prof. Lalnilawma, Department changtu Minister chuan he hun hi khuallian niin a hmanpui.
Thlirletna thutkhawmah hian khuallian Prof. Lalnilawma chuan Rural Development Department pawimawhna leh Department hmalakna thlirletna thutkhawm pawimawhnate bakah, Department hnuaia Officer-te fuihna thu a sawi a. Rural Development Department chu mipuite dawr tam ber Department leh hmuh theiha an hna thawhte lansarh berna Department a nih thu sawiin, Officer-te chu fimkhur taka hna thawk turin a chah a. Department hnuaia hna thawhte thlirletna thutkhawm (review meeting) neih thin chu Department tana a pawimawhzia tarlangin, thlen chin atanga hmasawn zel tur chuan kan thlen chin hriat chian chu tihmakmawh a nih thu a sawi a. Officer kalkhawmte chu Sawrkar kutke ber an ni tih hrethiam turte, inveng renga rinawm leh dik taka hna thawk turtea chahin, sawrkar kalpui mek ‘Project Rotling’ tihhlawhtlin kawngah theihtawp chhuahpui zel turin a sawm nghal bawk a ni.
Vawiina thlirletna thutkhawmah hian Rural Development Department hnuaia scheme hrang hrangte kalpui dan bihchian a ni a. Hun hman hi Pu R. Zarzosanga, Commissioner & Secretary, RD Department chuan kaihruaiin, kalkhawmte lawmna thu leh review meeting kalpui dan tur tlangpui a sawi fiah a. State Cell MGNREGA kaltlanga District leh Block hrang hrangte dinhmun ngaihthlak a ni a. Directorate of Rural Development atangin BADP, PMKSY-WDC 2.0, SAGY leh SASCI kalpui dan thlirletna presentation bengvarthlak tak ngaihthlak a ni a. MzSRLM kaltlanga SRLM leh DDU-GKY kalpui dante pawh ngaihthlak a nih hnuah Social Audit Unit, MISSAAT, SIRD & PR, Project Director leh BDO thenkhat hnen atangin presentation ngaihthlak a ni bawk.
