Chin state a Myanmar sipai sorkar dotu pawl lian ber Chin National Front (CNF)/Chin National Army (CNA) te chuan tun hnai khan Mizoram lama tawlhruk tur ruihhlo an man cheng vaibelchhe 40 chuang hu an halral.CNA-te hian Mizoram lama heroin tawlhruk tur an man khawm hi an sipai hmunpui, Farkawn khua atanga hla vak lo Camp Victoria ah an halral a. India tangka a cheng vaibelchhe 40 chuang hu ni a hriat a ni a.
Ruihhlo halralna-ah hian Farkawn VCP leh joint YMA hruaitute pawhin tel pui-in thu an sawi a. Mizorama thalai tam tak suat theitu tur ruihhlo an lo man avangin CNA te chungah lawmthu an sawi a ni.
