Ruihhlo do kawnga hmalak zel dan tur relin vawiin khan CM Conference Hall ah Chief Minister Pu Lalduhoma hovin Ruihhlo Do Core Committee te an thukhawm.
Chief Minister chuan Core Committee chu thukhawm tam lo mah se tha thlah hauh lovin ruihhlo do hna an thawk thin a ti a, Sawrkar tharah chuan tunhma aia nasa leh hlawk zawka ruihhlo do an tum dawn tih sawiin hemi atana ruahmanna tha leh tangkai tur ngaihtuah ani dawn a ti a, Sum leh pai mamawh tur a tul anga ngaihtuah zel ani dawn tih a sawi.
Thutkhawmah hian Supply tihtlem kawnga hmalakna chu Excise & Narcotics lamin kengkawh se an ti a. Ruihhlo supply titlem tura sum leh pai mamawh te, a dona lama sawrkar puitu tlawmngaipawlte hnena thuneihna pek dan tur leh an hmanraw mamawh pek dan tur te an rel a. Ruihhlo ngai te enkawlna lam chu Social Welfare lamin keng kawh se an ti bawk. An hmalak mek te leh hmachhawp an neih te tarlangin, TNT Lunglei building sakna tur hmuh a nih thu te, de-addiction centre sakna tur Ministry of Tribal Affairs lama dap mek a nih dan te, district jail pasarih thuamthatna tura hmalak mek a nih thu leh ruihhlo ngai te enkawlna lama thawhpui tur foreign lam thlenga dap a nih dan te tarlan tarlan a ni bawk.
Thutkhawmah hian Home Minister Pu K. Sapdanga, Social Welfare Minister Pi Lalrinpuii leh Excise Minister Pu Lalnghinglova Hmar te pawhin an Department kaltlanga hma an lak dan tlangpui an tarlang a ni.
