Aizawl Vaivakawn khawtlang in ruihhlo do beihpui hawn inkhawm, an huam chhunga a senchi lane tia hriat hmuna an buatsaih chu nimin khan Excise Minister Lalnghinglova Hmar chuan a hmanpui. Excise Minister chuan zu leh ruihhlo do kawngah khawtlang nena tanho loh chuan sorkar ringawt chu tha a chak tawk lo tih sawiin, mihring leh hmanruaahte an indaih tawk lo a, khawtlang nen theih tawpa tan ho a ngai tih a sawi.
Vaivakawnin zu leh ruihhlo an dona-ah sorkar anga tihve theih a awm chuan theihtawp an chhuah dawn a ti a, mimal ang pawha theihtawp chhuah a tum tih a sawi bawk a ni.Pu Lalnghinglova Hmar chuan Vaivakawn khawtlang hruaitute nen ruihhlo do beihpui thlak chungchangah tum thum an inkawm tawh thu sawiin, hun, sum leh tha a duh avangin an huphurh pawh awm a tihpui a, mahse khawtlang kalkhawmin zu leh ruihhlo laka fihlim veng ni turin huaisen taka thutlukna siam an nih thu a sawi.
Excise Minister hian ruihhlo do bultanna atan Vaivakawn khawtlang hnenah hian Cheng 20,000 hlanin a tul anga ngaihtuah zel a nih tur thu a sawi.
