Lunglei leh Serchhip district ah te nimin khan Fimkhur thla- Road Safety Month hawn a ni a, Lungleiah chuan zingkarah Venglai Traffic Point-ah “I him theih nan Traffic Rules te tha takin zawm thin ang che” tih thupuia hmangin, ‘Road Safety Month chu Lunglei South Bialtu MLA Pu Lalramliana’n a hawng a, Ngaihnathiamna tel lova lirthei endik hna kalpui a ni nghal bawk a ni. He hunah hian thusawiin, Pu Lalramliana chuan man hlauh avang chauhva Dan zawm chuan Motor Vehicle Act leh Traffic Rules te’n a awmzia a nei thui dawn lo a ni a ti a. Dan chu mipuite himna atana zawm tura siam a nih thu leh, Duty awm lai chauhva zawm, awm lo veleh zawm leh lo an nih chuan lirthei chetsualna avangin nunna hlu tak an la inchan zel ang tih a hlauhawm hle a ni, a ti.
Lunglei SP Pu Rahool Alwal pawhin thu sawiin Lunglei district-ah kum 2022 khan lirthei Accident avangin mi 2 in nunna an chan thu leh kum 2023-ah erawh chuan mi 7 laiin nunna an chan thu a sawi a. Hei vang hian mitinin tha taka dan an zawm a, an fimkhur tlan a ngai hle a ni a ti. Serchhip district-ah pawh nimin khan “33rd District Road Safety Month 2024” chu Serchhip Bazar tualzawlah Serchhip SP Pu MS Dawngkima’n a hawng a. Serchhip District-ah kum 2021 khan lirthei chetsualna thlengah nunna chan mi 7 awmin kum 2022-ah mi 10 an awm thu leh, nikum-ah erawh an awm loh thu SP chuan a sawi a.
Khawvela thalai te zingah thihna thlentu tam ber chu lirthei accident vang a nih thu leh, lirthei accident thlentu tam ber chu lirthei khalh chak lutuk vang a nih thu a sawi a. Nu leh pa te pawh an tu leh fa kum tlinglo te chu lirthei khalhtir lo turin a chah nawn leh a, Road Safety Month hman a nih chhung hian mitinten fimkhurna leh hawihawmna vawng reng tura chah thar bawk a ni.
