Nizan thim hlima nasa taka rial tla chuan East Phaileng leh a khaw thenawm Pehlawn khua-ah in 169 a deng chhia. Aizawl district-a East Phaileng VCP Pu Ngaihawma hnen atanga thu dawn danin an khua-ah hian minute 10 chhung vel rial tam tak a tla a, hei hian in 121 a deng chhia a. In 7 chu luah tlak loh khawpin a deng chhia a, a dang pawh ruah a sur emaw, rial a tla leh emaw a nih chuang luah tlak loh tur deuh vek niin a sawi. Vawiin khan kohhran awm zawng zawngin biak-in kharin hnatlang an huaihawt a, a theih ang angin in chhiate hi an thawm tha a. An khua a rangva lei tur awmin siamthatna tur a daih loh avangin naktuk lama hnatlan zawm an tum thu a sawi. Pehlawn khua-ah pawh hriat theih chinah rial tla-in in 48 a deng chhia a. Pehlawn VCP Pu Sakhmingmawi-a’n a sawi dan chuan ruah lo sur leh chuan, in 8 chu awmna tlak a ni loving a ti.
East Phaileng a rial tla hi a tam hrim hrim bakah a lian a, a then chu ar-la tui tiat vel lai niin an sawi a ni. Hetih lai hian nimin tlai dar 5:30 vela Kolasib district a thli tleh, ruah sur leh rial tla avangin Kolasib leh a chhehvelah in chhia thahnem tak a awm a, heng zingah hian kar leh Ningani zan atanga Pathianni zan thleng UPC (NEI) Gen. Conference vawi 56-na, Kolasib Vengthar UPC Biak in bula Pandal sak zawh thawkhat tawh chu a tlu sawp a, Pandal tlu sawp hi vawiin chawhma inkhawm ban atang khan seng hawiin, chawhnu atang khan a thar sa turin bul tan leh a ni. Vawiin vek khan UPC (NEI) Gen Supdt Rev K.
Lalduhsanga, Gen Secretary Rev C. Lalthantluanga leh Gen Treasurer Rev C. Lalmuanpuia te chuan a hmunah tlawh in, Organising Comtt hruaitute nen an thukhawm a, inkhawmpui hi a hun leh hmun ngaiah nghah tho tum ni se, Pandal pawh a hmun ngaiah theihtawp chhuahin sak that leh ni se, an ti a, vawiin tlai lam atang khan Kolasib Sub-Hqrs YMA Pandal ruhrel hmangin hmalak chhunzawm nghal a ni. Pandal sak hna hi Tripura Dharmanagar lam a hnam dangten an sa a, a chhung chei mawi leh hna tlem te chauh hmabak a awm tawh tih in hetiang chhiatna hi a thleng a, Pandal satute pawh zanin hian an khua atangin an lo let chhoh leh beisei a ni.
