Vawiin khan Aijal Club-ah kawlphetha renchem leh awmze nei zawka hman tangkai a nih theih nana hmalakna ‘Demand Side Management Project’ hawnna hun programme hman niin, P&E Minister Pu F. Rodingliana chu he hunah hian khuallian a ni.
He huna khuallian Power & Electricity Minister Pu F. Rodingliana chuan kum 10 chhunga power kan mamawh zat a let deuh thawa a pun thu sawiin, kum 2015 a kan mamawh san lai berin 97 MW vel a nih laiin tunah chuan 163 MW chuang a lo ni ta a, hetihlai hian kan power siamchhuahte a pung si loh avangin ram pawn atangin man to tak takin kan chawkluh a ngai a, chuvangin renchem taka power kan hman a tul a ni tiin, unit khat kan vawnthat (save) hian unit khat dang power thar chhuak tluk kan ni, a ti a. Mizoram Sorkar-in power-a intodelh turin nasa taka hma a lak mek thu sawiin, Central lamah bawhzui ngaite bawhzui zel a ni a, reiloteah project tha tak tak bul tan a nih thuai theih a beisei thu a sawi a ni.
Power Minister chuan kalkhawmte hmaah AT&C loss avanga energy hloh tam lutuk tih tlem a tul zia sawiin, thawktute chu hemi kawngah tan la tura fuihin, thahnem ngai taka mahni hna theuh thawk turin leh kan hnate chu eizawnna mai anga ngai lova, rawngbawlna leh ram leh khawtlang tana thawk kan ni tih inhre renga, tha thlah lova hna thawk thin turin a chah bawk a ni.
He Project hi Bureau of Energy Efficiency (BEE), Ministry of Power, Govt. of India kaltlanga Mizoram DISCOM – Power & Electricity Department leh Green Tree Global Pvt. Ltd. te hmalakna tur a ni a, kum 2 chhunga power mamawh 10% tala tih hniam tum a ni. Khawvel ram hrang hrangin an ngaih pawimawh em em Paris Agreement-a India a tel ve avangin energy renchem tura hmalakna hian ngaih pawimawh a hlawh em em a ni.
