Mizoram State Rural Livelihood Mission (MzSRLM) leh Rural Development Department buatsaih, thingtlanga kuthnathawktu hmeichhiate tharchhuah zawrhna, Sales of Articles of Rural Artisans Society (SARAS) fair vawi – 10na chu vawiin khan Aijal Club Park ah neih a ni a, Rural Development Minister Prof. Lalnilawma chuan khuallian niin fair hi a hawng. Khuallian chuan thingtlanga hmeichhiate kut hnathawh chawikan nana dept hmalakna chu fakawm a tih thu a sawi a. thingtlanga kuthnathawktute chawikan nan an thil siam chhuah te ram danga thawn chhuah a nih theih nan theihtawpa hmalak a nih thu sawiin RD block hrang hrangah Cluster Level Federation building changtlung tak neih a nih theih nan hmalak mek a nih thu a sawi bawk.
Prof. Lalnilawma chuan December ni 20 hian MzSRLM leh Reliance Fresh ten inremna thutlung MoU ziak tura hmalak mek a nih thu sawiin, kartin sawhthing kg 100 leh hmarcha kg 25 supply tura inbiak rem a nih tawh thu a sawi. Vawiin hun hmanna ah hian lawmman hrang hrang sem niin, Community Service Award chu Meidum Village Organisation hnenah hlan a ni a, Best Performing Cluster Level Federation chu Tuikum CLF te hnenah hlan niin Outstanding Service Award chu Far Park Level Federation hnenah hlan a ni bawk.
Saras Fair ah hian dawr hrang hrang 49 awmin, thingtlang kuthnathawktu hmeichhiate siam chhuah leh thar chhuah hrang hrangte zawrh a ni a, fair hi karleh thawhlehni thleng neih a ni ang.
