Vawiin chawhma khan Rural Development & Administration Department Minister pisaah Prof. Lalnilawma leh Bhartiya Samruddhi Investments and Consulting Services Limited (Basics Ltd), Hyderabad Team-te chuan leilung hausakna hulhalh chunga thingtlanga eizawnna ngelnghet siam tura thawhho dan tur sawihona an nei a. He hun ah hian Pu V. Lalengmawia Additional Secretary, Pu Lalrohlua Director , Pi Zosangzuali Pachuau, CEO MzSRLM leh RD&A Department-a tawhtute an tel bawk a ni.
RD&A Minister Prof. Lalnilawma chuan Mizoram chu leilung hausakna, ram ngaw, boruak thianghlim leh lui engemaw zah luanna a nih rualin, hmasawnna ken tel mihring khawsak than zelna avangin kan leilung hausakna neihte uluk taka humhalh a tul thu a sawi a. Thingtlang lam a kan eizawnna, ei leh bar kan hmuh nana kan hmalaknate hian kan leilung hausakna a khawih chhiat lohna tura ruahmanna kalpui a tul thu a sawi.
Thingtlang lamah hmasawnna inbuk tawk kalpui a pawimawh thu te, ram leilung hausakna tichereu lova thingtlang mi te tan eizawnna ngelnghet siam dan tur te, Mizoram chhunga lui lian leh a fintu lui te te humhalh a pawimawh thu te, lui hnar leh lui kam a khawsa te tan tuihna tichhe lo zawnga eizawnna ruahman sak dan turte vawiin thutkhawm ah hian sawi ho a ni.
Thutkhawmah hian RD&A leh NEIDA tangkawpin Project Tuihna – Damkhawchhuahna kalpui meknaah Watershed Development Component of Pradhan Mantri Krishi Sinchayee Yojana 2.0 (WDC-PMKSY) hnuaiah tuihna 1465 chhinchhiah atangin 982 chu humhalh tawh a ni a. WDC-PMKSY 3.0 hnuaiah 8099 humhalh tura hmalak leh mek a nih thu tarlan a ni.
