Assam Rifles-te’n May ni 1 atanga Mizoram leh Myanmar ramri khar a nih tur thu an sawi lai-in Mizoram sorkar chuan hemi chungchang hi engmah a la dawng ve lo. Home Commissioner Pu H. Lalengmawia’n Akashvani Aizawl a hrilh danin Ministry of Home Affairs atangin May ni 1 atanga km 404 a thui Mizoram leh Myanmar ramri khar a nih tawh dawn thu hi engmah an la dawng lova. An dawn loh avangin engmah official-a hriat an neih loh thu a sawi.
Hetih lai hian Thawhlehni (April ni 23) khan Assam Rifles hotute hian Assam Rifles Camp, Darthlalang Tlang, Champhai-ah ramri hnaih khua Tlangsam, Zote, Ngur, Ruantlang leh Hmunhmeltha khawtlang hruaitute bakah YMA Sub Headquarters Champhai leh Champhai South Jt. VC leh Champhai North Jt. VC hruaitute kokhawmin an hmalak dan hrang hrang an hrilh a. Minstry of Home Affairs atanga thu an hmuh anga MP inthlan vuakveta ramri khar a nih hnua ramri khar a nih chhunzawm dan tur sawiin, April thla chung chu ngaihnathiamna kalpui a ni ang a, ram pahnih mite darkar 72 (ni 3) chhung an la cham thei dawn a. Eng emaw harsatna avanga hun bi tuk chhung aia rei chamturte chuan duty-te phalna lak hmaksak tur a ni tih leh, phalna la lote chungah erawh chuan action lak a ni thung dawn tih an sawi.
Assam Rifles hotute chuan Ministry of Home Affairs atanga thu an dawn angin May ni 1 atang chuan Champhai District chhunga Border Haat awmte chu khar a ni dawn tih sawiin, harsatna lian bikah erawh chuan chhinchhiahna fel tak nen inkal pawh theih a ni dawn niin an sawi bawk. Ramri khar chhan tur hi Champhai District chhung atanga ruihhlo tawlh nasa lutuk leh Myanmar mi leh sa-in Mizoram kal tlanga ruihhlo an tawlh nasa lutuk dan chahna tur niin an sawi a ni.
