Belgian chanchinbumi (photo journalist) pakhat chu silaimu ruak 2 a kawl avangin Lengpui tumhmunah man a ni.Police atanga Akashvani Aizawl thu dawn danin he chanchinbumi Simon Clement hi Ningani khan Lengpui tumhmunah man a ni a.
India ram atanga Myanmar a lut a nih avang leh silaimu kah ruah tawhna a kawl avangin Sairang Police Station-ah Arms Act leh Foreigners Act hmangin thubuai siamsak a ni a. Nimin khan Aizawl district court-ah hruai a ni a, tlai lamah Central Jail ah dahluh a ni.
Simon Clement hi Belgium rama Ghent khaw mi, thlalatu niin Journalism Fund Europe chuan an sawi a. Middle East leh khawvel hmun hrang hranga indona leh tharum thawhna hmuna nunaute tawrhna thla la-in chanchinbu lian leh darhzau tak takah a chhuak thin a ni.
