Mahni nunna lak hluar zel laka invenna leh inzirtirna ni, World Suicide Prevention Day chu vawiin khan Mizoramah hman a ni. He ni puala Mizorama hun hmanna pui ber chu Aizawla Directorate of Health and Medical Education Auditorium-ah neih a ni a, he hun hmanpuitu Health and Family Welfare Joint Secretary Pi Lalnunmawii Ralte chuan thusawiin mahni intih hlum duhna chu Mizoramah a hluar chho mek a ni a ti a, chung ngaihtuahna chu rilru lam natna-in a hrin chhuah a ni tih hriat chian a pawimawh a, mitin ten mahni bula awm, an chenpuite emaw, an thian leh lam hlaa awm pawh ni se, an chetzia leh khawsak phungah danglamna a awm leh awm loh thlithlai ngun a pawimawh a ti. Mahni intih hlum duhna mitin nunah a thlen loh nan rilru suk thlekte a eng zawnga her rema, harsatna tawhte hnehtu ni thei tura intih chhel a ngaih thu a sawi bawk.
He hun hmanpuitu Aizawl SP, Pu Rahul Alwal-a report atanga a lan danin Mizoramah kum 2014 atanga kum 2024 July thla thleng khan mahni intihlum mipa 794 leh hmeichhia 154, an vaiin mi 948 an awm a. Mahni inthi hlum te hi kum 20 atanga kum 39 inkar tam berin, mi 584 an ni a. Kum 40 atanga kum 69 inkarin dawt lehin heng kum zingah hian mahni nunna la mi 201 an awm a , kum 1 atanga kum 19 inkarah mani nunna la 117 awmin, kum 60 chung lamah mi 41 an awm bawk. Kumin bikah hian mahni intihhlumna hi tum 49 a thleng tawh a Zirchianna in a tarlan danin mahni intihhlum zinga zaa 84 chu mipa an ni a, hmeichhia zaa 16 an ni. Mizoramah hian kum 9 atanga kum 90 thlengin mahni intihhlumna hi a thleng ni a chhut a ni bawk.
Mahni intihhlum tum, mi beidawngte lo dawngsawnga, an harsatna leh buaina ngaihthlaksak tura Helpline TeleMANAS chungchang pawh he hunah hian tarlan niin TeleMANAS helpline no 14416 leh 18008914416 hmangin Counsellor leh thawktu dangte englai pawha biak pawh theih an ni a, Tin, anni bakah hian ARDSI Mizoram Helpline 7005983633 leh 9366191341 ah te pawh biak theih reng an ni bawk.
