Kawngpui NH-306 huamchhung Kawnpui leh Khamrang inkara ram neitute chu 4-Lane atana ram lak turah ram neitu dik tak chauhin an phu tawk compensation an lak mai tur thu sumdawnna atana hman tur anih loh thu hrilh an ni. Kolasib Addl DC DC Pi Melody Ngurthantluangi, Competent Authority for Land Acquisition CALA ni bawk chuan vawiin khan ram neitute hi ko khawmin hun kal tawha sorkar in ram a lakna a thil thleng tawh ah fimkhur a tul zia an hriat avanga in kokhawm annih thu a sawi a, NH-306 (Silchar – Aizawl panna kawng) a Kawngpui thlur li siam tura ram neitute hnena zangnadawmna pekchhhuah tawh, Package dangah thil diklo leh felhlel tam tak a awm ni a a lan avangin tuna hmabak Package 7-na ah hi chuan theih tawp chhuah in dik thei ang bera ram teh tum anih thu leh ram neitute hnenah zangnadawmna fel fai taka pek chhuah anih theih nana fimkhur taka kal an tum thu a sawi.
Package danga Compensation dawngtu zingah mahni ram awmna pawh hrelo, an ram zau zawnga nena in millo tih hriat reng khawpa thlai leh thil dang dang awm anga assess leh pawisa duh vanga vir buai huai huai an tam thu a sawi a. Tuna hma an lakna turah hi chuan thamna leh diklo taka in bum tumna te, ram leh thlai awmte hlutna bakah thil tih tumna a awm an remtih dawn loh thu a sawi a. Ram teh hunah ram neitu ngei emaw, compensation dawngtu tur ngei emaw a hmunah awm theuh turin a chah a ni.
He hunah hian Kolasib DC office a SDC Dr. Lalramdintluanga, ‘4-Lane Branch Officer’ chuan thu sawiin, ram neitute chuan ram teh ni ah lehkha fel fai tak an ken a tul thu a sawi a, Package danga zangnadawmna (award) tur tihfel tawh ah pawh a dawngtu tur dik tak te hnenah chauh sum pek chhuah anih tur thu sawiin, thil fel failo hriat chhuah anih chuan sum pek chhuah anih loh tur thu a sawi a. Ram pass pakhat chhunga compensation dawngtu tur 2/3 emaw an awm chuan Bank ah Joint Account siam in, PAN card pawh siam ngei turin a chah a ni.
