Home Minister Pu K. Sapdanga’n Myanmar, Bangladesh leh Manipur atanga unaute sahimna zawnga Mizorama raltlan sing 4, sang 2576 an awm mek a ti a, a theih anga sawrkarin chhawmdawl chhunzawm zel a tum tih a sawi. He thu hi vawiina Assembly thutkhawmah sawiin Pu K. Sapdanga chuan Mizoramah raltlan zat dik tak chhinchhiahna mumal tak neih a har a ti a, lut leh chhuak an awm reng tih sawiin Manipur atanga lo lut te chu February ni 9 thlengin mi 9248 an ni a ti a, Myanmar atanga lo lut te February ni 3 thlenga chhinchhiah danah mi 32161 an awm tih sawiin Bangladesh atanga lo lut te January ni 25 thlenga chhinchhiah danah mi 1167 an awm mek a ti a, sawrkar hmasa hunah raltlan tanpuina atan cheng vbch 3 dawn a ni tih a sawi bawk.
Minister chuan kuhva tawlhruk chungchang chu sawrkarin nasa takin a buaipui a ti a, Mizoramah ram pawn atanga dan loa lo lut kuhva chhek khawl a awm nual nia an hriat thu sawiin theihtawpin kuhva tawlhruk ti tawp turin hma an la a ti a, an sawrkar hnuah police checkgate ah ram pawn kuhva tlang tir lo tura thupek an chhuah chu Police duty ten an zawm tha hle tih a sawi bawk. Pu Sapdanga chuan Mizoramah kuhva chingtu sing 1 chuang vel an awm mek a ti a, heng harsatna te hi sawrkarin a hriatpui tih sawiin kuthnathawktute hmasawnna tur leh an hamthatna tur sawrkarin a ngaihtuah zel dawn tih a sawi.
Minister chuan ramchhunga thlai thar hralh chhuahna tur leh kuthnathawktute chawi kanna tur ti chhe thei anih avangin kuhva tawlhruk ti tawp turin mi tin tanpuina an mamawh tih a sawi bawk. Pu K. Sapdanga chuan ramri chungchangah district council hunlai atangin vawi 24 inbiakna a awm tawh a ti a, Delhi, Guwahati leh Aizawl ah ramri chungchang inbiakna neih thin niin sawrkarin a bawhzui dan kimchang erawh a vawnhim rih avangin tlangzarh vek a rem hrihlo tih a sawi bawk.
