Mizorama sahimna zawnga lo lut raltlante buhfai a tanpuina tur chungchangah sorkar laipui leh Mizoram sorkar an indawr mek. Home department hotute hnen atanga thu dawn danin raltlante chhawmdawlna atana cheng vaibelchhe 5 hu buhfai sorkar laipui-in a rawn pek tur chungchangah Ministry of Home Affairs nen an indawr mek a. Union Home Secretary an inthlak hlim deuh chauh a nih avangin he ruahmanna hi a kal muang ta deuh a. Bawhzui mek zel a ni, an ti a. Buhfai cheng vaibelchhe 5 hu hi Ministry of Consumer Affairs, Food and Public Distribution-in a rawn pek tur a nih laiin a man hi Ministry of Home Affairs-in a tum ang a.
Buhfai hi Myanmar, Bangladesh leh Manipur atanga rawn raltlante hnena a thlawna sem tur a ni. August ni 14 khan Ministry of consumer affairs, food and public distribution a under secretary chuan hemi chungchangah hian Mizoram food, civil supplies and consumer affairs secretary hnenah lehkha rawn thawnin a thlawna buhfai an rawn pek tur hi metric ton 1,379 leh quintal 34, cheng vaibelchhe 5 hu a nih thu a rawn hriattir a ni.
Sorkar laipui ruahmanna ang chuan buhfai an rawn pek tur hi ni 60 chhunga pek fel hman tur a ni a. Tunah hian ni 38 vel hun a kal tawh a. A phurh chhoh dan tur leh thil tul dang buaipui-in sorkar laipui leh Mizoram sorkara a mawhphurtute an indawr chho mek zel a ni. Tun dinhmunah Mizoramah raltlan mi 44,000 vel an awm a. Myanmar atanga lo lut mi 34,000 thelh, Manipur mi sang 8 thelh leh Bangladesh atanga lo lut 2,000 chuang hret an awm mek a ni.
