Lunglei district thuneitute chuan an district huam chhunga raltlante chu relief camp atanga an luh leh chhuah an khuahkhirh dawn.
Nimin khan Lunglei SP Pu Jerome Lalmuankima’n Ṭhaizawl relief camp-ah he thu hi sawiin, raltlan camp-ah duty te dah an nih tur thu leh duty-te leh raltlan camp leader te remtihna lo chuan camp aṭanga duh ang anga luh leh chhuah hi khuahkhirh a ni ang a ti a. Lunglei district SP ho hian Ṭhaizawl relief camp-ah Awareness Campaign for Myanmar Refugee buatsaih a ni a. He hunah hian Pu J. Lalmuankima leh staff te bakah Sub-Hqrs YMA, MZP Hqrs Lunglei leh MSU Regional Hqrs Lunglei te’n hun an hmang a ni. SP chuan raltlante chu Mizoram hmun hrang hrang a buaipui mek leh ṭhalai tam tak suattu ruihhlo tawlhrutu ni lo tur leh a tilui an awm a nih chuan dan anga hrem an nih tur thu a sawi a. License nei lo va lirthei khalh lo tur leh an khalh lui a nih chuan dan anga hmalak a nih tur thu sawiin, Kenbo 125 bike-te te chu mahni awmna camp theuhah khawtlang hruaitute leh Police te nen tangkawpin, hmun khatah khalhchhuah theihlohva dahkhawm turin hmalak a ni ang a ti bawk.
Sub-Hqrs YMA Lunglei Treasurer Pu K. Lalhruaitluanga pawhin, YMA kalphung leh hmalakna te a tarlang a, an chenpuite tana hnawksak lova awm turin a chah a, YMA Dan Bu leh Chhiatni Ṭhatni Inkaihhruaina Bu a hlan nghal a ni.
Lunglwei MZP Hqrs President Pu Johan Hmangaihzuala Ralte pawhin camp chhunga zirlai awm zatte leh an harsatna te MZP hnena thlen turin a ngen a, MZP chuan a theihna chinah a buaipui zel tur thu a sawi a. Tunhnaia raltlante pawikhawih an awm ṭhin chu pawi a tih thu sawiin; Lunglei District chhunga raltlante chu hetiang kawnga inhnamhnawih ve lo turin a ngen a ni.
MSU Regional Hqrs Lunglei Secretary Pu C. Lalthlamuansanga pawhin raltlan naupangte chu zirna ngai pawimawh tur leh nu leh pa pawhin an theihna kawngah an fate zirna lama an hmasawn theihna tura hma la turin a ngen a ni. Ṭhaizawl Refugee Camp-ah hian tun dinhmunah chhungkua 167 awmin, mi 746 an cheng mek a. Zirna in hi Primary aṭanga Higher Secondary thleng a awm a ni.
