Aizawl district tih loh district dang 10-ah raltlante hnena a thlawna buhfai sem hna chu zawh a ni tawh. Raltlan tam berna Champhai district-ah chuan raltlan 14,390 hnenah buhfai quintal 4,533 chu sem zawh vek a nih tawh thu Champhai district bawrhsap Pu V.L. Remliana chuan Akashvani Aizawl a hrilh a. Champhai district-ah hian Myanmar raltlan 13,986 awmin Manipur atanga sahimna zawnga awm mi 404 an awm mek bawk a ni. Champhai district dawta raltlan tamna ber Lawngtlai district-ah pawh raltlan 8,020 hnenah buhfai quintal 2,526 sem zawh a ni tawh bawk a. Lawngtlai district-ah hian Myanmar atanga raltlan mi 5,922 leh Bangladesh Chittagong Hill Tracts atanga raltlan 2,014 an awm mek a, Bangladesh raltlante hi district hrang hrangah awm darh lovin Lawngtlai district-ah chauh an awm a. Buhfai sem hna hi kum hlui November ni 11 khan Lawngtlai district bawrhsap Pu Cheemala Siva Gopal Reddy chuan a lo hawng tawh a ni. Raltlan awm tamna district pathumna Siaha-ah pawh raltlan 5,953 te hnenah buhfai quintal 1,875 sem a ni tawh a. Siaha district bawrhsap Pu V.L. Hruaizela chuan November ni 20 atang khan buhfai hi an sem tan tawh thu a sawi. Siaha district-ah hian Manipur raltlan an awm lova Myanmar atanga rawn raltlan hlang an ni.
Raltlan awm tlemna ber Khawzawl district-ah chuan raltlan 147 chauh an awm a, an zinga 19-te hi Manipur atanga rawn kal niin 128 te hi Myanmar mi an ni a, buhfai quintal 46 an sem zo tawh bawk a ni. Aizawl district-ah erawh chuan tun hnai khan buhfai sem hna hi tan chauh a ni a. A khaw tlai chhan hi Aizawl district a raltlan awm tam tak hi a thlawna buhfai dawn ngai lo tura khawsa theite an nih avangin an thlit fim chhungin hun a duh deuh niin an sawi. Sorkar laipui Ministry of Home Affairs chuan Mizorama raltlan awm zawng zawng tana a thlawna buhfai semna turin cheng vaibelchhe 5 a ruahman a. He pawisa hian buhfai metric tonne 1,379 chuang chu Ministry of Consumer Affairs, Food and Public Distribution hnenah buhfai lei-in Food Corporation of India (FCI) kaltlangin Mizoram sorkar Food, Civil Supplies & Consumer Affairs department chuan ruahmanna siam lawk angin district tinah an chanpual tur theuh an thlen sak a. Chu chu district tina thuneitute’n an district chhungah an lo sem chhuak leh a ni.
Mizoram sorkarin Ministry of Home Affairs hnena buhfai sem dan tur report a pek na a raltlan awm zat a thehluh chu mi 43,788 a ni a. Myanmar raltlan 33,764, Manipur atanga lokal 8,010 leh Bangladesh raltlan 2,014 te an ni a. Buhfai hi mi pakhat zela kg. 31 leh gram 500 zela sem tura chhut a ni.
