Rajya Sabha MP Pu K.Vanlalvena’n Sangau atanga Saisihchhuah inkar kawng sialna tur sum hnuh let chu a rem loh thu nimina DoNER Consultative meeting ah a sawi. Mizorama Rajya Sabha MP Pu K. Vanlalvena chuan Parliament Monsoon session neih zawh takah August ni 8-a a zawhna Union Minister of State for DoNER Sukanta Majumdar an Myanmar ramri panna kawng Sangau to Saisihchhuah kawng sialna chhanna chungchang he thutkhawmah hian a sawi chhuak a, kum 2021 February ni 10 ah he kawngpui laihna tur pawisa chu DoNER in NEC kaltlangin sanction order a tihchhuah thu leh hna thawktu atan Mizoram PWD thlang lova BRO an thlan zawk avanga harsatna tawk an nih thu a sawi.
Nimin tlai khan Development of North Eastern Region(DoNER) Consultative meeting , Parliament Anexie building Committee roomah Union Cabinet Minister of DoNER PU Jyotiraditya M.Scindia kaihhruaina in an thu khawm a.DoNER hnuaia North East state a hmasawnna hna thawh lai mek te chungchang an thlir ho. Pu K. Vanlalvena chuan PWD te ruahmanna pawm duh lova BRO ten Pangkhua paltlanga kawngpui sial an tum avang leh Pang khaw mipui ten compensation pek an phut avanga he project hi kal tluang lo a nih thu sawiin PWD te ruahman ang chuan kawngpui hian khawchhung a paltlang dawn loh avangin compensation ah harsatna a awm dawn loh thu a sawi a, project chu Chief Minister kalchhuak Pu Zoramthanga ngaih pawimawh zing ami a nih avangin pawisa pek tawh hnuhkir chu a remloh thu a sawi bawk.
He thutkhawmah hian Meeting Chairman leh DoNER Minister Jyotiraditya M. Scindia chuan hemi chungchang hi hun dangah uluk zawka sawi dun pui turin Pu Vena chu a sawm a. A tul dan anga a bawhzui tur thu a sawi bawk a ni.
