PWD Minister Pu Vanlalhlana chuan nimin khan Mizoram chak lakna kawngpui pawimawh ber pakhat, National Highway 06 & 306, Sairang aṭanga Vairengte inkar kawngpui chu tlawhin, a enfiah. Minister chuan Vairengte – Sairang inkar kawngpui chu Mizoram mamawh chakkhai lak luhna kawngpui pawimawh ber pakhat a nih avangin siam ṭhat thuai a ṭul thu a sawi a.
Lirthei lian thil rit tak tak phurin a zawh reng a nih avangin a chhe chak hle tih sawiin; kumin fur thlen hma ngeiin thawm ṭhat hna thawh zawh hman a nih theih nan he lai kawng siam ṭha tura hma lakna awm mek pawh chak zawka kalpui turin PWD hotute leh NHIDCL lamte chu a chah a. Contractor-te pawh kawng siam ṭhat nan lungchang ṭha leh hmanraw ṭha chauh hmang turin a chah bawk.
Vairengte aṭanga Sairang inkar kawng hi kilometre 122-a thui a ni a, kilometre 67 chuanga thui chu NHIDCL kutah awmin, kilometre 54 chuanga thui chu Mizoram PWD kutah a awm rih thung a. PWD hian a theih ang angin kawng thawm ṭhat hna hi thawk ṭhinin, kumin fur hma hian PWD leh NHIDCL hnuaia kawng awmte chu ngawrh zawka siam ṭhat tumin hma lak mek a ni.
