Ministry of Home Affairs chuan venhim ngai bik state a ramdangmite luh chungchangah vawiin khan Mizoram leh state dang pahnihte biak-hmuh-theih hmangin sawihona a buatsaih. Home department hotute’n an sawi danin Ministry of Home Affairs (MHA) hotute nena biak-hmuh-theih hmanga an inkawmna-ah hian tun hnai a Myanmar ramri hnaih state 3, Manipur, Mizoram leh Nagaland home department hotute an tel a. He’ng state pathuma kum 14 zet ramdangmi luh khuahkhirhna phelh a nih tawh hnu a, tun hnai a, khuahkhirhna kalpui leh tura tih a nih tak avanga sawiho an ni. MHA hotute chuan Myanmar ramri a awm Mizoram, Manipur leh Nagaland a lut tur ramdangmite chuan e-Foreigners Regional Registration Office (e-frro) portal-ah a bika luh phalna Restricted Area Permit (RAP) leh Protected Area Permit (PAP) te chu online a dil tur a nih thu an sawi a.
Hemi chungchang leh a kalpui dan tur hi home department hotute chu sawipui-in an hrilhfiah a ni. Ramdangmi lo lutte khuahkhirhna hlih a nih hma khan Mizoramah chuan ramdangmite’n a bik taka phalna an neih lo buaipuisak turin home department, SP, CID (Special Branch) leh district SP te chu ruat an ni thin a. Tuna hetianga khuahkhirh a nih leh dawn takah pawh hian a ngai ang bawka a buaipuitu ngaite hman leh phawt a nih tur thu home department hotute chuan an sawi a. Kum thar tirah hian helama mawhphur turte pual hian training buatsaih a nih tur thu an sawi bawk a ni.
Kar kal ta Thawhlehni khan MHA hian Manipur, Mizoram leh Nagaland chief secretary-te hnenah lehkha thawnin an state a ramdangmite an luh dawnin RAP leh PAP an neih a ngai leh dawn tih a hriattir a. Kum 2010 atanga hlih rih, he khuahkhirhna tuai thar leh a nih chhan hi ramdangmite’n he’ng state-ah te hian buaina an chawhchhuah hlauhthawn vang niin an sawi. RAP leh PAP neih hmasa tura tihna hi Foreigners (Protected Areas) Order, 1958 hmanga kenkawh thin a ni a, tuna khuahkhirhna thlah zalen hi December, 2027 thleng a ni chungin sorkar laipui chuan a rawn thar thawh leh ta thut a ni.
