Thuneitute chuan American nupa protected area permit (PAP) nei lova Mizorama an lo luh avangin Lengpui tumhmunah hren an ni a, nimin khan an ramah thawnkir an ni. Intelligence lam atanga thudawn danin United States khua leh tui PAP nei lo Mizoram a luh tum an awm tih thu hriat lawk a nih avangin Lengpui tumhmunah Zirtawpni khan an lo endik a. He tah hian American nupa chu PAP nei si lovin an lo thleng ngei a. Hren an ni a, thil tul tihfel a nih hnu-ah nimin khan an ramah thawnkir an ni.
Kum 14 chhung,central sorkarin a lo thlah dul tawh leh PAP leh RAP nei kher lova Mizoram tlawh theihna chu nikum December thla atang khan Ministry of Home Affairs chuan khauh taka kenkawh leh turin thupek a siam a. PAP leh RAP hi awlsam zawkin online a dil leh neih theih tura ruahman a ni. Khuahkhirhna hi Myanmar ramri depa awm Manipur, Mizoram leh Nagaland tan bika tihnun thar leh a ni a. Central sorkar phalna nei lo chuan he’ng state 3-ah te hian ram thenkhat mite chu luh khap an ni.
Thu dawn thenkhatah chuan American nupate hi Bangladesh lam ngaihven a rawn kal a, Lawngtlai district a luh tum anga sawi a ni a. Intelligence officer thenkhat erawh chuan chutiang an hriat loh thu leh PAP an neih loh avanga hren leh thawnkir an nih thu an sawi a ni. Mizoram leh Myanmar dep state pahniha zinmite luh khuahkhirh a nih chhan hi Mizoram kaltlanga Myanmar leh ramdanga lut a, hel pawlte raldo zirtir an awm thin tir central sorkar lamin a hriat vang ni a thudawn a ni.
