President Droupadi Murmu chuan Mizoram Minister hlui Pu Nirupam Chakma chu National Commission for Scheduled Tribes member atan a ruat. National Commission for Scheduled Tribes member atana Pu NIrupam Chakma ruatna thupek hi nimin khan President chuan a tichhuak a. Chakma hnam zinga ram pum huapa hetiang dinhmun sang chelh hmasa ber a la ni.
Pu Nirupam Chakma hi Chakma Autonomous District Council-ah nihna pawimawh tak tak lo chelh tawh thin a ni a. Chawngte assembly bial, tuna Tuichawng bial ni ta-ah hian vawi 5 MLA atana thlan tlin a ni a, Minister nihna kum 10 chhung zet a chelh bawk a.
Kum 2019 khan BJP ticket-in Mizoram bial atangin Lok Sabha inthlanpui a chuh a, a tling lova. Kum 2020 atang khan BJP National Council Member atan ruat a ni.
