Ram chhunga rel chawlhhmun thar leh thuam thar 554 leh rel kawng chunga kawngchhawng siam leh a hnuai lama siam 1,500 zet chu naktuk hian Prime Minister Narendra Modi chuan a hawng emaw lung a phum emaw dawn a, Sairang rel chawlhhmunah hemi rual hian hun hman ve a ni ang.
Northeast Frontier Railway thuneitute hnen atanga thu dawn danin Prime Minister hun hman hi zing lam dar 10 leh minute 45 atangin Sairang rel chawlhhmunah lo hmanpui ve tur a ni dawn a. Tunah hian hmarchhak bialah hian rel kawng siam leh a kaihhnawih hna hrang hrang cheng vaibelchhe 81,941 man hu thawh mek a ni a. Rel chawlhhmun hman mek 60 chu khawvel ram danga rel chawlhhmunte ang bawka changkanga siam turin cheng vaibelchhe 10,369 zet ruahman a ni bawk.
Hetih lai hian Northeast Frontier Railway Consultant Pu R. Hrangtawna chuan Bairabi leh Sairang inkar rel kawng siam mekah Hortoki rel chawlhhmun chu thla thar March thla hian hawn hman tum a ni a ti a. Bairabi atangin rel kawng phah hna hi thaw mek a ni a, Hortoki rel chawlhhmun siam hna chu an zo thawkhat tawh niin a sawi. Sairang thlenga rel lut a, Sairang rel chawlhhmun hawn hun tur atan kumin October emaw November thla emaw tinzawn a nih thu a sawi bawk a ni.
