PHE Minister Prof Lalnilawma’n tunhnaia Aizawl tui tlan, tlawng lui chu tlawng hnaih tlangpanga lei awm te a min nasat vangin a nu nasa hle tih drone hmanga an enfiah hnuah, hmuh chhuah a nih thu a sawi.
PHE Minister chuan Tlawng lui nu nasa chu a thlitfim chhung a hautak avangin tui pump chhuah a khaihlak phah nasa hle a, hei hian Aizawl ah tui harsatna a thlen phah tih sawiin, tui nut chhan hre chiang turin hma an lak thu te, Hemi chungchang hi Chief Secretary a sawipui bakah, Bawrhsap leh AMC hotute nen pawh sawiho a, AMC lam pawhin leivung paih tur an ven nasat thu te sawiin; chhan dang awm thei a nih avangin Drone hmangin tlawng lui chhehvel hi thla an la kual ta a ni a ti. PHE Minister chuan tui lakna, Reiek kai atanga Muallungthu leh Darlung kai lam thla an lak kual thu a sawi a, Muallungthu ram chhung hmung hrang hrangah leimin a tam hle a, chu chu tui ti nu tu a ni tak ber thu a sawi.
Hei bakah hian, Minister chuan, tui nut chhan an zir chianna atanga an hmuh chhuah, an data te chu tui nu ven theihna tur project lian tham deuh siam nan te pawh an la hmang tangkai thei dawn tih a sawi a, he hmalakna hi tuna an harsatna tawh mek, sutkian nghal theihna ni lo mah se nakin zel atana la tangkai tur a ni a ti a; hetianga tui nut chhan zirchianna hi department in an vawikhat neihna a nih thu a sawi bawk. Prof Lalnilawma chuan Cyclone Remal avanga tui lakna khawl chhiate chu siam that mek a nih thu sawiin, khawl thenkhat Guwahati lama an thawn te pawh kar leh chuan Mizoram a rawn thlen an beisei tawh thu a sawi. Chutihrual chuan ruah a surin lui tui a nut nasat thin avangin tui pump chhuah a khaihlak leh thin a, tuna an harsatna ber chu tui nu a nih thu a sawi a ni.
