Upper Assam-a Rel kawng chhia vanga Hmarchhak state hrang hrangten tuialhtheia harsatna an tawh chuan ziaawm lam a la pan thei chiah lo. Aizawlah pawh vawiina petrol pump inhawngahte tuialhthei lak tum an la intlar thui hle niin kan Corr. chuan a sawi a. Aizawl Treasury Sq-a Mizofed petrol pump Manager Pu Rohinliana chuan Diesel chu Silchar bul Monirbond Oil Depot-ah a thlen tawh thu sawiin, petrol phur turin tanker engemaw zat Guwahati-ah an chhuk thla, a ti a. Nizan khan Mizofed petrol pump Treasury square-ah petrol litre Sing 2 leh MINECO pump-ah litre Sing 1 Sang 2 an hlan thlak thu sawiin, vawiin tlai dar 5 thleng khan inhawngin chuta petrol dinhmun azirin naktukah ‘free sale’ chhunzawm tur nge coupon neite chauh tan hralhchhuah tur tih thutlukna an siam ang a ti a, naktuk zanah Vairengte atangin tanker an rawn thlen an beisei thu leh Diesel erawh an ‘free sale’ reng tur thu a sawi bawk.
Hauva petrol pump chuan petrol litre Sing 1 Sang 2 neiin naktuk atangin an ‘free sale’ ang a, diesel erawh an nei rih lova,Zangena petrol pump-ah diesel an ‘free sale’ mek a, vawiin tlai hian petrol litre 11,000 a rawn thlen an beisei a, a rawn thleng a nih chuan an zuar chhuak nghal dawn a ni. Hetih lai hian Rel kawng hi siam that a nih tawh avangin reiloteah tuialhthei lak luh pawh a inphaman chho tura beisei a nih thu Mizoram sorkar chuan a sawi a. Sorkar thuchhuah tarlan dan in Mizoram aiin Tripura-in harsatna an tawh nasat zawk avangin rel-in tuialhthei a phurh hmasak pahnih chu Tripura tan zuah phawt a ni a, a pathumna chu IOCL hotuten Mizoram tan ni se, an ti a.
Tuialhtheia harsatna tawh mekah mipuite lo chiai lo turin Food, Civil Supplies & Consumer Affairs Department chuan a ngen a. Petrol pump ṭhenkhat, harsatna remchanga laa a hlawma ‘black’-a zawrh tur lo pe chhuak ṭhin an awm tih hriat a ni tih sorkar thuchhuah chuan sawiin hemi vil tur hian District hrang hranga FCS&CA Department, Deputy Commisisoner office leh SP office ṭangho te’n hma an la a, petrol pump-te CCTV footage thlengin en ṭhin tur a ni, a ti. Hetihlai hian Petroleum Entrepreneurs and Transport Union of Mizoram (PETUM) chuan Food, Civil Supplies & Consumer Affairs Department thuchhuah hi chhanglêtin, thu hriatna rintlak leh chhui chianna awm hmasa loin petrol pump neitute vaukhanna niawm tak thuchhuah an siam a, an trade licence cancel-sak hial tura hma lak a tum chu hriatthiam har an ti tih thu a sawi.
