Power & Electricity department hotute sawi danin tun tangka kum chhung hian department hnathawkte’n tan an lak avangin Load shedding (inenchhawktir) vawi khatmah siam a la ni lo. Department hotute chuan hei hi hmasawnna ropui taka an ngaih thu an sawi a. Mizoram pumin kawlphetha a hman tam lai bera a mamawh zat chu megawatt 167 point 85 MW niin tun January 2025 ah hian hei hi a kai a. Kawlphetha pawta hmangtu zawng zawng hi mi nuai 3, leh 722 an awm mek. An chhut dan chuan Mizoram hian tuitha hmang (Hydro Power)a kawlphetha siam chhuah theihna (potential) hi megawatt 3,500 a nei mek a. Nitha (Solar Power) siam chhuah theihna hi a siam chhuah tam ber laiin megawatt 9,090 siam chhuah theihna a nei mek bawk an ti a. Kalphetha sem darhna tha leh tlo zawk siam tumin kawng hrang hrangin department thawktute chuan hma an la a. Chhungkaw chawm ngah lutuk transformer-te siam rem leh a tulna hmuna transformer thar dah te an tum a. Khaw chhung electric hrui te pawh Ariel Bunched Cable (XLPE) a thlak vek tum a nih thu an sawi a ni.
Tuna an dinhmun mekah tuitha hmanga kawlphetha siamchhuah theihna hmun (Hydel Generating Station) hi 15 neiin kawlphetha an siam chhuah theih zat belh khawm chu megawatt 38 point 55 a ni. Ni tha hmanga kawlphetha siamchhuahna (Solar Generation Station) hi 5 awmin kawlphetha a pek chhuah theih zat chu megawatt 22 point 3 a ni. Kawlphetha sem darhna kawngah 132 kV line hi km 999 leh metre 75 a thui, 66kV line (33 kV level charge) hi km 128 leh metre 31 a thui, 33kV line hi km 1,532 leh metre 28 a thui, 11kV line hi km 5,555 leh metre 45 a thui, 11kV line (ABC) hi km 27 leh metre 8 a thui, LT line hi km 3,664 leh metre 42 a thui, LT ABC line hi km 217 leh metre 72 a thui an enkawl mek a. 132kV Power Sub Station hi 15 , 33kV sub station hi 64, transformer 2,404 leh building 454 an nei a ni.
Power department-in hna thawh mek lian tham tak chin 13 an nei a. Heng zingah hian Mw 10 pe chhuak thei tur Thenzawl Solar Power Plant leh Mw 5 pe chhuak thei tur Sumsuih Solar Plant te a tel a. Thenzawl hi kumin March thlaa an zawh theih an inbeisei. Mizoram pumah Smart Meter kalpui a ni dawn a, a pilot phase atan tunah hian Zarkawt vengah chhungkaw 500 velah kalpui chhin mek a ni. Kawlphetha siam chhuahna atan hmalak mek a awm nual a. Megawatt 24 pe chhuak thei tur Tuirini hydro electric project chu detailed project report (DPR) peihfel a ni tawh a, megawatt 24 vek pe chhuak thei tur Tuivawl HEP chu DPR tunlai sum hlutna mila siamthat leh a ni. Kawlphetha megawatt 210 siamchhuak thei tur Tuivai HEP hi DPR ennawn leh mek a ni a, megawatt 460 pe chhuak thei tur Kolodyne HEP chu DPR ennawn leh tur a ni a, kawlphetha megawatt 120 pe chhuak thei tur Tlawng HEP chu kuminah DPR peih fel beisei a ni. Heng bakah hian DPR siam tura bawhzui mek pathum an awm mek bawk ani.
