April ni 19 –a Lok Sabha inthlan neih turah People’s Conference party (PC Party) Candidate atan Pi Rita Malsawmi, Aizawl Laipuitlang a cheng mek ruat a nih thu an party President Pu Vanlalruatan a puang. Vawiin khan Kolasib District MJA Press Club-ah PC Party General Hqrs President Pu Vanlalruata chuan an party Candidate hi puangin, thlan tlin anih theih nan theihtawp chhuah an tum thu a sawi a, an Candidate chu thlan tlin anih chuan party bik tan nilo; mipuite huapzo tur leh mipuite duh khawpa hnathawk thei tur anih thu a sawi. MP atan thlan tlin anih chuan mipuiten awlsam taka an dawr theih nan Aizawl-ah office hawn an tum thu sawi in, an Candidate chu vote theuh turin Mizoram mipuite a sawm ani.
Pu Vanlalruata chuan, kum thar 2025 ah an party chuan an kum 50-na (lawm an tum thu sawi in, state Assembly inthlan hnuhnung berah Candidate an neih loh chhan chu an party in insawhngheh an duh vang anih thu leh tunah chuan an party office luah man an dawn thin atangin an in sawhngheh deuh tawh thu a sawi bawk.
PC Party MP Candidate atana puan tak Pi Rita Malsawmi chuan thusawi in, thlan tlin anih chuan Mizoram sorkar chu dik taka hna a thawh theih nan thawhpui a tum thu a sawi a, sorkar laipui in Uniform Civil Code (UCC) kalpui a tum te, Myanmar nena ramri hung a tum leh Free Movement Regime (FMR) thiah a tum te chu na taka dodal a tum thu a sawi a, PC party Founder Brig. T. Sailo (L) sulhnu chhui in Bairabi Hydel Project hmalakna chhunzawm leh District hrang hrangah Industry lian tham din anih theih nana hmalak a tum thu a sawi.
PC Party MP Candidate Pi Rita Malsawmi hi Pu LT Muana (L) leh Pi Vanlalruati, Kolasib Venglai te fanu niin, November ni 22, 1975 ah Hortoki ah piang in, Kolasib ah hian a seilian a, tunah hian Aizawl Laipuitlangah a cheng mek ani. Eizawnna leh hnathawh avangin hun engemawchen India ram khawpui thenkhatah a cheng thin a, zai leh hla phuah lamah te kal in, Modelling lamah pawh thui tak a kal bakah Five Star Hotel ah te a thawk thin ani.
